Pune Accident News : पुण्यातील कर्वे रोडवर भीषण अपघात झाल्याची माहिती समोर आली आहे. या अपघातात एका २५ वर्षीय तरुणाचा मृत्यू झाला आहे. हा तरुण उड्डाणपुलावरुन वेगाने दुचाकी चालवत होता. मेट्रो स्टेशनजवळ त्याचे दुचाकीवरचे नियंत्रण सुटले. अपघातात तरुणाच्या डोक्याला गंभीर दुखापत झाली होती.

मिळालेल्या माहितीनुसार, २ जुलै रोजी मध्यरात्री बारा-साडेबाराच्या सुमारास राजसिंग तमट्टा हा तरुण दुचाकीवरुन येत होता. कर्वे रोडवरील नळ स्टॉप मेट्रो स्टेशनजवळीच उड्डाणपुलाच्या कड्याला त्याची दुचाकी आदळली. त्याला जवळच्या रुग्णालयात उपचारांसाठी नेण्यात आले. आज उपचारादरम्यान त्याचा मृत्यू झाला.

'राजसिंग तमट्टा हा कोथरूड येथील कम्युनिटी कॅफेचा रहिवासी होता. २ जुलैच्या मध्यरात्री कर्वे रोड उड्डाणपुलावरून वेगाने दुचाकी चालवत असताना मेट्रो स्टेशनजवळ त्याचे नियंत्रण सुटले. उड्डाणपुलाच्या कड्याला दुचाकीने जोरदार धडक दिली. राजसिंगच्या डोक्याला गंभीर दुखापत झाली', अशी माहिती पोलिसांनी दिली आहे.

घोरपडी गावातील रहिवासी विनोद पिल्ले यांनी या अपघाताची माहिती अलंकार पोलीस स्थानकातील पोलीस कर्मचाऱ्यांना दिली होती. अपघाताबाबत समजताच पोलिसांनी राजसिंगला रुग्णालयात नेले. त्याच्यावर उपचार सुरु होते. रुग्णालयातच राजसिंगचा मृत्यू झाला. पोलिसांनी या प्रकरणी पुढील तपासाला सुरुवात केली आहे.