पुण्यात अपघाताची मालिका सुरू आहे. पुण्यातील नवले पुलानंतर आता हिंजवडी आयटी पार्कामध्ये भीषण अपघात झाला आहे. हिंजवडी पार्कात सोमवारी झालेल्या भीषण अपघातात दोन शाळकरी मुलांचा मृत्यू झाला आहे. या अपघातानंतर एकच खळबळ उडाली.

मिळालेल्या माहितीनुसार, पुण्यातील हिंजवडी आयटी पार्कात झालेल्या भीषण अपघातात दोन शाळकरी मुले दगावले. आयटी कर्मचाऱ्यांना घेऊन जाणारी बस थेट फुटपाथवर चढली. या बसने धडक दिल्याने फुटपाथवरील एक शाळकरी मुलगा आणि एका मुलीचा मृत्यू झाला. या अपघातात एकूण ५ ते ६ जण जखमी झाल्याची माहिती मिळत आहे. हिंजवडी पार्कातील अपघाताचे नेमकं कारण अद्याप समजेले नाही.

हिंजवडी पार्कात सोमवारी सव्वा सहा वाजण्याच्या सुमारास ही अपघाताची घटना घडली. या भागात सायंकाळच्या सुमारास वर्दळ असते. या वर्दळीच्या वेळेत अपघात झाल्याने अनेकांची धावाधाव झाली. बसच्या अपघातामुळे प्रवासी आणि पादचारी लोक घाबरून गेले. अपघातानंतर पादचारी लोक जखमींच्या मदतीला पोहोचले. त्यांनी तातडीने जखमींना रुग्णालयात दाखल केले.

पोलिसांना या अपघाताची माहिती मिळताच घटनास्थळी पोहोचले. त्यांनी घटनास्थळावर जमा झालेली बघ्घ्यांची गर्दी पांगवली. तर अपघातामुळे रस्त्यावर मोठी वाहतूक कोंडी झाली होती. पोलिसांनी वाहनधारकांना तातडीने वाट मोकळी करून दिली. त्यामुळे अपघातानंतर काही वेळेत पोलिसांनी रस्त्यावरील वाहतूक सुरळीत केली . पुण्यातील या भीषण अपघाताने सर्वसामान्यांच्या सुरक्षेचा प्रश्न ऐरणीवर आला आहे.

अपघातानंतर लोकांकडून संताप व्यक्त केला जात आहे. लोकांनी बस चालकावर कारवाईची मागणी केली आहे. या प्रकरणात बस चालकावर गुन्हा दाखल झाल्याचे माहिती अद्याप समोर आलेली नाही.