गोपाळ मोटघरे,मावळ

पुणे जिल्ह्यातील मावळ तालुक्यात रविवारी दुपारच्या सुमारास एक दुर्दैवी घटना घडली आहे. जाधववाडी धरणात पोहण्यासाठी उतरलेल्या सहा जणांपैकी तिघांचा पाण्यात बुडून मृत्यू झाला आहे. पाण्याची खोली आणि प्रवाह याचा अचूक अंदाज न आल्याने ही दुर्घटना घडली आहे.

मिळालेल्या माहितीनुसार, मावळ तालुक्यातील नवलाख उंब्रे एमआयडीसी परिसरातील जाधववाडी येथे सदर घटना घडली आहे. नवलाख उंब्रे येथे फिरण्यासाठी आलेल्या सहा तरुणांचा ग्रुप हा दुपारी जाधववाडी धरणाजवळ पोहोचला. काही वेळ परिसरात वेळ घालवल्यानंतर त्यांनी पाण्यात उतरून पोहण्यास सुरुवात केली. सुरुवातीला सर्व काही सुरळीत सुरू होते, मात्र धरणातील पाण्याच्या खोलीचा अंदाज न आल्याने त्यापैकी तिघे जण पाण्यात बुडाले, तर उर्वरित तिघांना स्थानिकांच्या मदतीने वाचवण्यात यश आलं.

दरम्यान, घटनेची माहिती मिळताच वन्यजीव रक्षक मावळ संस्था, शिवदुर्ग मित्र लोणावळा, NDRF पथक तसेच तळेगाव दाभाडे अग्निशामक दल घटनास्थळी दाखल झाले. त्यांनी तातडीने बचावकार्य सुरू करत पाण्यात बुडालेल्या तिघांचा शोध घेतला आणि त्यांना बाहेर काढले. जखमी अवस्थेत सापडलेल्या तरुणांना त्वरित ‘विरा ॲम्बुलन्स सर्विस’च्या माध्यमातून तळेगाव दाभाडे येथील जनरल हॉस्पिटलमध्ये उपचारासाठी दाखल करण्यात आले.

मात्र डॉक्टरांनी तपासल्यानंतर अजय गारुडे, अनिकेत पवार आणि संतोष एडके यांना मृत घोषित केले. या घटनेमुळे परिसरात हळहळ व्यक्त होत असून, मृतांच्या कुटुंबीयांवर दुःखाचा डोंगर कोसळला आहे. उष्णतेच्या दिवसांत धरण, तलाव किंवा नदीकाठी फिरण्यासाठी जाणाऱ्यांनी विशेष काळजी घेणे गरजेचे असल्याचे पुन्हा एकदा अधोरेखित झाले आहे. धरण किंवा तलावांमध्ये पोहताना पाण्याची खोली, प्रवाह आणि सुरक्षितता याचा अंदाज घेणे अत्यंत महत्त्वाचे आहे. एक छोटा चुकीचा अंदाजही जीवघेणा ठरू शकतो. त्यामुळे अशा ठिकाणी पोहणे टाळावे किंवा आवश्यक ती खबरदारी घेऊनच पाण्यात उतरावे.