सागर आव्हाड, पुणे

पुण्यातून मोठी बातमी समोर आली आहे. पुणे सोलापूर महामार्गावर स्कोर्पिओ चालकाचे नियंत्रण सुटल्याने भीषण अपघात झाला. या अपघातात एकाचा मृत्यू झाला असून तिघेजण गंभीर जखमी झाले आहेत. शिवाय स्कोर्पिओ कारचा देखील चक्काचूर झाला आहे. सदर घटना कोरेगाव मूळ ग्रामपंचायत हद्दीतील इनामदार वस्ती परिसरात घडली आहे. गौरख त्र्यंबक माने असे मृत्यू झालेल्या व्यक्तीचे नाव आहे. तर समाधान अंकुश बाबर, विजय सूर्यकांत माने, अलिकेश खान असे अपघातात जखमी झालेल्या तिघांची नावे आहेत.

मिळालेल्या माहितीनुसार, आज सकाळी सात वाजण्याच्या सुमारास समाधान बाबर यांचे मामा विजय माने, चुलत मामा गौरख माने व त्यांचे मित्र अलिकेश खान असे चौघेजण मुंबई येथे कामानिमित्त गेले होते. काम झाल्यानंतर हे चौघेही गुरुवारी संध्याकाळी मुंबई येथून रात्री करमाळ्याकडे निघाले होते. दरम्यान हडपसर पुणे येथे सकाळी साडेसहा वाजताच्या सुमारास आले, नंतर विजय माने हे स्कार्पिओ चालवण्यास बसले होते. तर त्यांच्या शेजारील सीटवर गौरख माने हे बसले होते. तर पाठीमागील सीटवर समाधान बाबर व विजय माने हे बसले होते.

उरुळी कांचन पोलीस ठाण्याच्या हद्दीतील प्रयागधाम फाटा व कोरेगाव मूळ जवळ आले असता विजय माने यांचा स्कोर्पिओवरील ताबा सुटला आणि स्कार्पिओ कार ही हायवेवरून खाली उतरून झाडाला धडकली. या अपघातात तिघेजण गंभीर जखमी झाले तर, गौरख माने यांच्या डोक्याला व हातापायाला गंभीर दुखापत झाली.

सदर घटनेची माहिती मिळताच उरुळी कांचन पोलीस ठाण्यातील पोलीस हवालदार उद्धव गायकवाड, हरिष शितोळे, अमोल राऊत, बाळू चोरमले घटनास्थळी दाखल झाले. तसेच सर्व जखमींना कस्तुरी रुग्णवाहिकेचे माऊली लाड, संतोष झोंबाडे, रतन चव्हाण यांनी नागरिकांच्या मदतीने उरुळी कांचन येथील सिद्धीविनायक रुग्णालयात दाखल करण्यात आले. दरम्यान, उपचारादरम्यान गौरख माने यांचा मृत्यू झाला तर इतर तीन जणांवर उपचार सुरु आहेत. या घटनेने परिसरात भीतीचे वातावरण निर्माण झाले.