अर्णबनंतर बंगालच्या उपसागरात निर्माण झालेल्या मुरासु चक्रीवादळामुळे देशभरातील हवामानात मोठा बदल पाहायला मिळतो आहे. या वादळामुळे ऐन हिवाळ्यात पावसाला पोषक वातावरण निर्माण झालं आहे. याची चांगली बाजू म्हणजे अवकाळी पडत असलेल्या पावसामुळे धरणांच्या पाणी पातळीत वाढ होत आहे. मात्र गेल्या वर्षीच्या तुलनेने यंदाचा पाणीसाठा फार कमी असल्याचं तज्ज्ञांचं म्हणणं आहे.

पुण्यात आज सकाळपासून पावसाने धुडगूस घातला आहे. यामुळे खडकवासला धरणसाखळीतील चारही धरणांच्या पाणलोट क्षेत्रात वाढ झाली आहे. २४ तासांच्या कालावधीत झालेल्या पावसाने पानशेत धरण परिसरात सर्वाधिक १३ मिलिमीटर पावसाची नोंद झाली. तर वरसगाव येथे ११, खडकवासला येथे ८ आणि टेमघर येथे ५ मिलिमीटर पाऊस पडला.

सध्या चारही धरणांमध्ये मिळून २३.५१ टीएमसी पाणीसाठा उपलब्ध आहे. हा साठा धरणांच्या एकूण क्षमतेच्या ८०.६५ टक्के आहे. मात्र, गेल्या वर्षी याच दिवशी धरणांमध्ये २८.४० टीएमसी म्हणजेच ९७.४१ टक्के पाणीसाठा होता. त्यामुळे यंदा गेल्या वर्षीच्या तुलनेत ४.८९ टीएमसीने पाणीसाठा कमी आहे. चारही धरणांपैकी टेमघर धरण परिसरात १ जूनपासून आतापर्यंत सर्वाधिक ३ हजार २५२ मिलिमीटर पाऊस झाला आहे. त्यापाठोपाठ पानशेतमध्ये २ हजार ३५५, वरसगावमध्ये २ हजार २०८ आणि खडकवासला धरण परिसरात ७९० मिलिमीटर पावसाची नोंद झाली आहे.

पाणीसाठ्याचा विचार करता वरसगाव धरणात सर्वाधिक ८५.६३ टक्के पाणी शिल्लक आहे. टेमघर धरणात ८४.६३ टक्के, पानशेतमध्ये ७७.६७ टक्के, तर खडकवासला धरणात सर्वांत कमी ५६.८२ टक्के पाणीसाठा आहे.धरणनिहाय पाणीसाठा पाहता खडकवासला येथे १.१२ टीएमसी, पानशेतमध्ये ८.२७ टीएमसी, वरसगावमध्ये १०.९८ टीएमसी आणि टेमघरमध्ये ३.१४ टीएमसी पाणी उपलब्ध आहे. पावसामुळे धरणांच्या पाणीसाठ्यात वाढ होण्यास मदत होत असली, तरी गेल्या वर्षीच्या तुलनेत यंदाचा साठा कमी असल्याचे आकडेवारीवरून स्पष्ट होत आहे.