सागर आव्हाड, पुणे

पुणे जिल्ह्यातील नरसापूर परिसरातील बलात्कार प्रकरण ताजे असतानाच मुळशी तालुक्यात एका गावात अत्यंत संतापजनक घटना घडली आहे. दुचाकीवरून फिरत आईस्क्रीम विक्री करणाऱ्या एका विक्रेत्याने १४ वर्षीय गतिमंद मुलीचा विनयभंग केल्याचा प्रकार समोर आला आहे. या घटनेमुळे परिसरात तीव्र संताप व्यक्त होत असून नागरिकांनी आरोपीवर कठोर कारवाईची मागणी केली आहे.

मिळालेल्या माहितीनुसार, पीडित मुलगी दुपारी सुमारे दोन वाजण्याच्या सुमारास आपल्या लहान चुलत बहिणीसह घराजवळ आलेल्या आईस्क्रीम विक्रेत्याकडे आईस्क्रीम घेण्यासाठी गेली होती. यावेळी आरोपी पिंटू शिवकुमार याने मुलीला आईस्क्रीम देण्याच्या बहाण्याने तिच्याजवळ येत अश्लील कृत्य करत विनयभंग केला.

या प्रकाराने घाबरलेल्या मुलीने तत्काळ आरडाओरडा करत घरी धाव घेतली आणि घडलेली घटना आपल्या कुटुंबीयांना सांगितली. घटनेची माहिती मिळताच कुटुंबीय आणि ग्रामस्थांनी तातडीने परिसरात आरोपीचा शोध सुरू केला. काही वेळातच आरोपीला पकडण्यात आले आणि त्याला पौड पोलिसांच्या ताब्यात देण्यात आले.

पौड पोलिसांनी या प्रकरणाची गंभीर दखल घेत तातडीने गुन्हा दाखल केला आहे. गुन्हा क्रमांक १२३/२०२६ अंतर्गत भारतीय न्याय संहिता (BNS) कलम ७४ तसेच बालकांचे लैंगिक अपराधांपासून संरक्षण कायदा (POCSO) २०१२ अंतर्गत कलम ८ व १२ अन्वये आरोपीवर गुन्हा नोंद करण्यात आला आहे. सध्या पोलिसांकडून आरोपीची सखोल चौकशी सुरू असून पुढील तपास सुरू आहे.