Mumbai News : आगामी मुंबई महापालिकेच्या निवडणुकीआधी शिवसेनेतीने अनेक माजी नगरसेवक, पदाधिकारी पक्षाला रामराम ठोकत आहेत. एकीकडे ठाकरे गटाला मुंबईत खिंडार पडायला सुरुवात झाली असताना, दक्षिण मुंबई विभागात ठाकरे गटात अनेक पदाधिकाऱ्यांमध्ये नाराजी असल्याची सूत्रांची माहिती आहे.

नाराज पदाधिकाऱ्यांमध्ये माजी नगरसेवक, विधानसभा संघटक, शाखाप्रमुख, उपशाखाप्रमुख यांचा समावेश आहे. काल शिवसेना मध्यवर्ती कार्यालयातून केलेल्या नियुक्त्यांवरून ठाकरे गटाच्या स्थानिक पधादिकाऱ्यांमध्ये नाराजी असल्याची माहिती आहे.

विधानसभा क्षेत्रातून वर येणारे नेतृत्व दाबण्यासाठी नवीन पद देण्याचा घाट सुरु असल्याचं स्थानिक पदाधिकाऱ्यांच म्हणणं आहे. (Latest Marathi News)

मुंबईत विधानसभा संघटक हे पद आहे. परंतु कुलाबा विधानसभा क्षेत्रात विधानसभा प्रमुख हे पद निर्माण करून विधानसभा संघटकाला खाली खेचण्याचा प्रयत्न आहे का? असा सवाल पदाधिकाऱ्यांकडून उपस्थित केला जात आहे. (Political News)

उद्धव ठाकरेंची भेट घेणार

काही महिन्यापूर्वीच ठाकरे गटाकडून दक्षिण मुंबईचे विभाग प्रमुख बदलले आहेत. त्यामुळे देखील स्थानिक शिवसैनिकांमध्ये नाराजी असल्याच पाहायला मिळत होतं. नाराज असलेले पदाधिकारी येत्या दोन दिवसात पक्षप्रमुख उद्धव ठाकरे यांची भेट घेणार आहेत.

पदाधिकारी आपल्या नाराजाची सर्व माहिती उद्धव ठाकरे यांना देणार आहेत. उद्धव ठाकरे नाराजी दूर करण्यात यशस्वी होतात की ठाकरे गटाला दक्षिण मुंबईत नाराज शिवसैनिकांच्या रूपात खिंडार पडतं हे पाहणं महत्वाचं असेल.