संघर्ष गांगुर्डे, डोंबिवली

कल्याण-डोंबिवली परिसरात एका लग्नसमारंभात राजकीय गटांचे दिग्गज नेते एकत्र पाहायला मिळाल्याने राजकीय वर्तुळात चांगलाच चर्चेचा विषय निर्माण झाला आहे. खासदार डॉ. श्रीकांत शिंदे, मनसेचे नेते राजू पाटील आणि शिवसेना (शिंदे गट) संपर्क प्रमुख महेश गायकवाड हे तिघेही एका मंचावर दिसले असून त्यांच्या हलक्या-फुलक्या गप्पांचा व्हिडीओ आता सोशल मीडियावर जोरदार व्हायरल होत आहे.

लग्न समारंभात अनौपचारिक वातावरणात झालेल्या या भेटीने अनेकांच्या भुवया उंचावल्या आहेत. तिन्ही नेत्यांच्या चेहऱ्यावरचे हसू, हातवारे आणि निवांत बोलण्याची शैली पाहता नक्की काय चर्चा झाली?असा प्रश्न नागरिकांमध्ये चर्चेचा विषय ठरला आहे.

सद्या महापालिका निवडणुका, स्थानिक संघटनात्मक समीकरणे आणि विविध राजकीय घडामोडींमुळे वातावरण तापलेले असताना हे दृश्य अधिकच लक्षवेधी ठरले आहे. मात्र हा औपचारिक राजकीय बैठकीचा प्रसंग नसून, सामाजिक समारंभात झालेली साधी-सरळ भेट असल्याचे सूत्रांचे म्हणणे आहे.

दरम्यान, विरोधी गटातील नेते एकत्र आल्याने सोशल मीडियावर मीम्स, कमेंट्स आणि तर्क-वितर्कांचा पूर आला आहे. काहींनी ही राजकीय मैत्रीची झलक म्हणून पाहिले तर काहींनी नव्या समीकरणांची चाहूल असा विश्वास व्यक्त केला आहे. नेमकी चर्चा काय झाली? याबाबत कोणतीही अधिकृत प्रतिक्रिया समोर आलेली नसली तरी या व्हिडीओने कल्याण-डोंबिवलीच्या राजकीय वर्तुळात नवा रंग भरला आहे, एवढे मात्र नक्की