Pune Crime News: गेल्या काही दिवसांपासून राज्यात गुन्हेगारीच्या घटनेत मोठी वाढ झाली आहे. चोरी, खंडणी तसेच नागरिकांच्या मनात दहशत तयार करण्यासाठी भररस्त्यात गुंडांच्या टोळ्या धुमाकूळ घालत आहेत. या टोळक्यांचा कायमचा बंदोबस्त करण्यासाठी पोलिसही मोहिमा राबवत आहे. अशातच पिंपरी चिंचवड पोलिसांनी शहरात धुमाकूळ घालणाऱ्या किटक टोळीचा चांगलाच बंदोबस्त केलाय. (Latest Marathi News)

भरदिवसा गोंधळ घालत दहशत निर्माण करणाऱ्या किटक टोळीला पोलिसांनी (Police) अटक केली. इतकंच नाही तर, या गुंडांनी घातलेली दहशत कमी करण्यासाठी पोलिसांनी त्यांची तळेगाव दाभाडे येथे धिंड काढली. किटक भालेराव, वैभव राजाराम विटे विशाल शिवाजी गुंजाळ प्रदीप वाघमारे, रुतिक मेटकरी, अशी अटक केलेल्या आरोपींचे नाव आहे.

टोळीचा म्होरक्या किटक भालेराव याने त्याच्या साथीदारांसह तळेगाव दाभाडे (Pimpri Chinchwad) येथे भरदिवसा मुलींची नावे घेऊन गल्लीमध्ये आरडाओरडा केला होता. इतकंच नाही तर, त्याने महिलेला मारहाण करून विनयभंग देखील केला. महिलेच्या दीराला कोयत्याचा धाक दाखवून खिशातील दीड हजार रुपये काढून घेतले. लोकांना धमकावून दहशत केली.

गुन्हे शाखेच्या गुंडा विरोधी पथकाचे सहायक पोलीस निरीक्षक हरीश माने आणि त्यांच्या पथकाने आरोपींचा माग काढून अटक केली. गुन्ह्याच्या तपासकामी आरोपींना घटनास्थळी नेले. आरोपींची धिंड काढल्याने नागरिकांना दिलासा मिळाला.

किटक टोळीचा प्रमुख असलेला किटक भालेराव याच्या विरोधात तळेगाव दाभाडे पोलीस ठाण्यात दरोडा, विनयभंग, बेकायदेशीर शस्त्र बाळगणे, खुनाचा प्रयत्न करणे, मारहाण करून धमकी देणे व दहशत निर्माण करणे असे दहा गुन्हे दाखल आहेत.

Edited by - Satish Daud