सोनी मगर

Pimpri Chinchwad Crime News:

चारचाकी कारच्या टपावर बसून अश्लील हावभाव करणाऱ्या दोघांना पोलिसांनी चांगलाच इंगा दाखवलाय. स्टंटबाजी करणाऱ्या या दोन तरुणांना पोलिसांनी ताब्यात घेतलं असून त्यांच्यावर कारवाई सुरू आहे.

कारच्या टपावर बसून स्टंटबाजी करतानाचा व्हिडीओ गेल्या काही दिवसांपासून सोशल मिडीयावर व्हायरल होतोय. हे दोन्ही तरुण फक्त स्टंट करत नाही तर ते अश्लील हावभाव देखील करतात. स्टंटबाजीसाठी हे दोघं मर्सिडीजसारखी आलिशान कार वापरायचे. या गाडीच्या काचाही काळ्या होत्या. पुण्याच्या निगडी परिसरात हे दोघं स्टंटबाजी करायचे.

पोलिसांच्या नजेरत हा व्हिडीओ येताच त्यांनी या दोघांचा शोध घेतला. तसेच तात्काळ या दोघांना ताब्यात घेत त्यांच्यावर कारवाई केली. ओंकार कृष्णा मुंडे आणि त्याचा मित्र प्रतिक शिंगटे अशी या दोन तरुणांची नावं आहेत.

स्टंट करण्यासाठी वापरलेली एम.एच-43-आर-7272 क्रमांकाची आलिशान मर्सिडीज कार ही जप्त करण्यात आलीये. तसंच त्यांच्या विरोधात एमआयडीसी भोसरी पोलीस स्टेशनमध्ये भादवि कलम 279, 336 तसंच मोटार वाहन कायादा कलम.184, 179, 177, प्रमाणे गुन्हा दाखल केला आहे.

या कारवाईनंतर पोलिसांनी स्टंटीबाजी करणाऱ्यांना कडक इशारा दिलाय. गाडी चालवताना वाहतुकीचे सर्वसामान्य नियम पाळणं अत्यंत गरजेच आहे. गाडीच्या टपावर बसून असे जीवघेणं स्टंट करणे हे स्टंट करणाऱ्या तसंच इतरांच्याही जीवावर बेतू शकतं.