डोंबिवलीत पुन्हा एकदा मराठी–हिंदी भाषिक वाद पेटल्याचं चित्र दिसून आलं आहे. राज्यात गेल्या काही महिन्यांपासून मराठी भाषेच्या वापराबाबत सातत्याने वादविवाद होत असतानाच डोंबिवलीतील एका पटेल मार्टमध्ये घडलेली घटना चांगलीच गाजत आहे. सामाजिक कार्यकर्ते श्रीनिवास घाणेकर हे खरेदीसाठी या दुकानात गेले असता, मराठीत संवाद साधण्याच्या त्यांच्या विनंतीवरून एका महिला कर्मचाऱ्याशी त्यांचा जोरदार वाद झाला. संबंधित महिला कर्मचाऱ्याने संतापून "मराठी बोलण्याची सक्ती आहे का?" असा सवाल केला. तिच्या या अरेरावीपणामुळे परिस्थिती चिघळली आणि दुकानातील वातावरण क्षणात तापलं.

घडलेल्या घटनेनंतर घाणेकर यांनी तात्काळ दुकानाच्या व्यवस्थापक मनीषा धस यांना या प्रकाराची माहिती दिली. त्याच वेळी काही महाराष्ट्र नवनिर्माण सेनेचे कार्यकर्तेही घटनास्थळी दाखल झाले. मॅनेजर मनीषा धस यांनी घाणेकर यांची समजूत काढली आणि या प्रकाराबद्दल खेद व्यक्त केला. त्यांनी आश्वासन दिलं की, भविष्यात अशा प्रकारची चूक कोणत्याही कर्मचाऱ्याकडून होणार नाही.

दरम्यान, श्रीनिवास घाणेकर यांनी पटेल मार्टला थेट अल्टिमेटम दिला आहे. त्यांनी स्पष्ट केलं की, १५ ऑक्टोबरपर्यंत जर दुकानातील सर्व कर्मचाऱ्यांनी मराठीत संवाद सुरू केला नाही, तर ते दुकानाबाहेर उभं राहून ग्राहकांना इथून खरेदी न करण्याचं आवाहन करतील. त्यांच्या या इशाऱ्यामुळे दुकान व्यवस्थापनावर प्रचंड दबाव आला आहे.

मराठी आणि हिंदी भाषिक वादावरून निर्माण झालेलं हे प्रकरण भविष्यात आणखी उग्र होणार का, की दुकान व्यवस्थापन तातडीने मराठीत संवाद सुरू करून तणाव शांत करणार, याकडे सगळ्यांचं लक्ष लागलं आहे.