Palghar Earthquake News : मुंबईजवळच्या पालघरमध्ये रविवारी रात्री अचानक भूकंपाचे (Palghar Earthquake) धक्के बसल्यामुळे नागरिकांमध्ये भीतीचे वातावरण होते. पालघरमधील डहाणू तलासरी भागात रविवारी संध्याकाळी ७ वाजून २३ मिनिटांच्या सुमारास भूकंपाचे सौम्य धक्के जाणवले. या घटनेत कोणतीही दुखापत किंवा मालमत्तेचे नुकसान झाल्याचे वृत्त नाही.

रविवारी रात्री अचानक डहाणू आणि परिसरात भूकंपाचे तीव्र धक्के जाणवले. भूकंपाचे धक्के सौम्य असले तरी या हादऱ्यामुळे नागरिकांमध्ये भीतीचं वातावरण होतं. काही सेकंदासाठी जमीन हादरत होती, त्यावेळी नागरिकांनी घराबाहेर पळ काढला होता. दरम्यान, पालघर आणि परिसरात मागील अनेक महिन्यांपासून भूकंपाचे हादरे जाणवत आहेत. २०१८ पासून पालघर आणि परिसरामध्ये सतत भूकंपाचे लहान-मोठे हादरे बसत आहेत.

पालघरमध्ये अचानक भूकंपाचे धक्के

पालघरमध्ये रविवारी अचानक गूढ आवाजाने जमीन हादरली. स्थानिकांच्या मते हे भूकंपाचे सौम्य धक्के होते . डहाणू तलासरी भागात संध्याकाळी ७ वाजून २३ मिनिटांच्या सुमारास भूकंपाचे धक्के जाणवले. भूकंपाच्या धक्क्याने डहाणू, तलासरी आणि आजूबाजूचा परिसर हादरला होता.

पालघरमध्ये भूकंपाचे सतत हादरे -

पालघर, डहाणू आणि तलासरी तालुक्यांमध्ये २०१८ पासून वारंवार भूकंपाचे सौम्य धक्के जाणवत आहेत. रविवारी रात्री पालघरमध्ये पुन्हा भूकंपाचे हादरे जाणवले. याआधी ७ जानेवारी २०२५ रोजी पहाटे साडेचारच्या सुमारास डहाणू, तलासरी, बोर्डी, दापचरी, धुंदलवाडी, चिंचले, हळदपाडा येथे ३.७ रिश्टर स्केल तीव्रतेचे तीन धक्के जाणवले होते. ३१ डिसेंबर २०२४, ऑगस्ट आणि ऑक्टोबर २०२४ मध्येही डहाणू परिसरात सौम्य धक्के जाणवले होते.