लोकसभा निवडणुकीच्या तिसऱ्या टप्प्याच्या मतदानापूर्वी केंद्र सरकारने कांद्यावरील निर्याबंदी हटवून शेतकऱ्यांना मोठं गिफ्ट दिलं. ४० टक्के उत्पादन शुल्क लावून सरकारने कांद्याची निर्यात करण्यास परवानगी दिली. मात्र, तरी देखील कांद्याने शेतकऱ्यांचा वांदाच केला आहे. तांत्रिक कारणामुळे कांद्याचे तब्बल ४०० कंटनेर मुंबईत अडकून पडले आहेत.

जेएनपीटी आणि कस्टम विभागाची वेबसाईट अपडेट न झाल्यामुळे हे कंटेनर मुंबईतील बंदरावर अडकून पडल्याची माहिती आहे. कंटेनर खोळंबल्याने जहाजाचे भाडे देखील वाया गेले आहेत. याचा मोठा फटका व्यापाऱ्यांना बसला आहे. सरकारने ही समस्या लवकरात लवकर सोडवावी, अशी मागणी होत आहे.

कांद्याचे भाव नियंत्रित ठेवण्यासाठी गेल्यावर्षी केंद्र सरकारने कांदा निर्यात बंदी केली होती. पुढे ही निर्यातबंदी मार्च २०२४ पर्यंत वाढवण्यात आली. याचा मोठा फटका शेतकऱ्यांना बसला. कांद्याचे भाव झपाट्याने खाली आल्याने शेतकरी हवालदील झाले.

सरकारने कांद्यावरील निर्याबंदी हटवावी अशी मागणी केली जात होती. विरोधकांनी देखील या मुद्द्यावरून सरकारला चांगलंच घेरलं होतं. अखेर तिसऱ्या टप्प्यातील मतदानापूर्वी केंद्र सरकारने कांद्यावरील निर्याबंदी हटवण्याचा निर्णय घेतला. यामुळे कांदा उत्पादक शेतकऱ्यांना काहीसा दिलासा मिळाला.

निर्यातबंदी हटवताना केंद्र सरकारने कांद्यावर ४० टक्के उत्पादन शुल्क देखील आकारलं. आता शेतकऱ्यांनी कांद्याची निर्यात सुरू केली आहे. मात्र, त्यानंतरही शेतकऱ्यांच्या अडचणी काही सुटत नाही. तांत्रिक कारणामुळे कांद्याचे तब्बल ४०० कंटनेर मुंबईतील बंदरावरच अडकले आहेत. आज ही अडचण दूर होण्याची शक्यता आहे.