रोहिदास गाडगे

Pune Crime News: पुण्यातील गुन्हेगारीच्या घटनांचे प्रमाण दिवसेंदिवस वाढत चालले आहे. जुन्नर येथे एका तरुणीचा दोन प्रियकरांनी मिळून खून केल्याची धक्कादायक घटना घडली आहे. मात्र ही हत्या फक्त प्रेमाच्या वादातून झालेली नसून पैशांवरून झाली आहे.

मिळालेल्या माहितीनुसार, गेल्या तीन दिवसांपासून नारायणगाव येथे एका ३० वर्षीय महिलेचा मृतदेह अज्ञात ठिकाणी पडून होता. पोलिसांना याची माहिती मिळताच त्यांनी घटनास्थळी दाखल होत अधिक तपास सुरू केला. सदर महिला वडगाव कांदळी येथील वडामाथा परिसरात मृत अवस्थेत सापडली होती.

पोलिसांनी महिलेची ओळख पटवत तिचे घर गाठले. यावेळी ३० वर्षीय महिलेचे दोन पुरूषांबरोबर प्रेम संबंध असल्याची माहिती समोर आली. त्यांनी दोन्ही प्रियकरांचा शोध घेतला. दोघेही तरुण ३० वर्षीय तरुणीच्या प्रेमात होते. मात्र तरुणी दोघांना देखील ब्लॅकमेल करत होती. दोन्ही प्रियकरांकडे तरुणी सातत्याने पैशांची मागणी करत होती. मात्र पैसे न दिल्याने ती त्यांना वेगवेगळ्या धमक्या देऊ लागली.

तरुणीच्या सततच्या या त्रासाला दोन्ही प्रियकर कंटाळले होते. त्यामुळे त्यांनी एकत्र येत एक कट रचला. दोघांनी तरुणीला एका अज्ञात ठिकाणी नेले. तिथे तिच्या पाठीत आणि डोक्यात वार करत तिला ठार केले. सदर घकटनेने परिसरात एकच खळबळ पसरली आहे.