अंबरनाथसह डोंबिवली आणि बदलापूर एमआयडीसीत यापुढे रासायनिक टँकर्सना नो एंट्री असणार आहे. संध्याकाळी ६ ते सकाळी ६ या वेळेत ही प्रवेशबंदी असणार आहे. ठाणे पोलिसांच्या (Thane Police) विशेष शाखेनं याबाबतचे आदेश जारी केले आहेत. त्यामुळं या टँकर्सचा रात्रीस खेळ थांबणार आहे. एकीकडे नद्यांची स्वच्छता केली जात असतानाच नद्यांमध्ये, नाल्यांमध्ये रात्रीच्या वेळी रासायनिक सांडपाणी सोडण्याचे प्रकार मागील काही दिवसात आढळून आले आहेत.

हे देखील पाहा -

त्यामुळं यापुढे एमआयडीसी विभागात संध्याकाळी ६ ते सकाळी ६ या वेळेत रासायनिक टँकर्सना प्रवेशबंदी करण्यात आली आहे. ठाणे पोलिसांच्या विशेष शाखेचे उपायुक्त डॉ. सुधाकर पठारे यांनी याबाबतचे आदेश दिले आहेत. त्यामुळं या टँकर्सच्या माध्यमातून रात्रीच्या अंधारात केल्या जाणाऱ्या कृष्णकृत्यांना चाप लागणार आहे.

ठाणे जिल्ह्यातील अंबरनाथ, बदलापूर, डोंबिवली एमआयडीसीत मोठ्या प्रमाणात रासायनिक कारखाने असून बहुतांशी कारखाने हे त्यांच्या सांडपाण्यावर प्रक्रिया न करता नदी किंवा नाल्यात सोडतात. तर काही कारखाने हे सांडपाणी टँकरमध्ये भरून दूरच्या एखाद्या नाल्यात सोडण्यास सांगतात. त्यातच अंबरनाथ एमआयडीसीत सामायिक सांडपाणी प्रक्रिया केंद्र सुद्धा बंद असल्यानं हे प्रकार मागील काही दिवसात चांगलेच वाढले होते. त्यामुळं आता पोलिसांच्या या आदेशानंतर जलस्रोतांमध्ये केलं जाणारं रासायनिक प्रदूषण थांबेल, अशी आशा आहे.

Edited By - Shivani Tichkule