सचिन जाधव, साम टीव्ही, प्रतिनिधी

Pune : पुण्याच्या कोथरुड भागातील गोळीबार प्रकरणात पोलिसांनी कारवाई करायला सुरुवात केली आहे. कुख्यात गुंड निलेश घायवळ यांच्या टोळीतील सदस्यांनी गोळीबार केला होता. या प्रकरणी पोलीस निलेश घायवळ आणि त्याच्या टोळीतील सदस्यांवर मकोका अंतर्गत कारवाई करत आहेत. टोळीतील ७ जणांना पोलिसांनी अटक केली आहे. यादरम्यान निलेश घायवळ लंडनला पळून गेल्याची माहिती समोर आली आहे. तपासादरम्यान पोलिसांना घायवळ संबंधित महत्त्वाची माहिती मिळाली आहे.

मिळालेल्या माहितीनुसार, लंडनला पसार झालेला गुंड निलेश घायवळने पासपोर्ट मिळवण्यासाठी अहिल्यानगरमधील पत्ता दिल्याचे समोर आले आहे. पुण्यात निलेश घायवळवर अनेक गंभीर गुन्ह्यांची नोंद आहे. त्यामुळे पुण्यात पासपोर्ट मिळण्यास अडचण येऊ शकते हे तो ओळखून होता. पासपोर्टसाठी त्याने नगरमधील बनावट पत्त्याचा वापर केला.

अहिल्यानगरमधील कोतवाली पोलीस स्टेशनच्या हद्दीतील गौरी घुमटानंदी बाजार, कोतवाली, माळीवाडा रोड हा पत्ता घायवळने पासपोर्ट तयार करण्यासाठी वापरला होता. आता अहिल्यानगर जिल्ह्यातील कोतवाली पोलीस ठाण्यातील पोलिसांनी निलेश घायवळचा गुन्हेगारीचा इतिहास न तपासताच त्याला पासपोर्टसाठी संमती कशी दिली हा प्रश्न उपस्थित केला जात आहे.

निलेश घायवळ आणि त्याच्या टोळीची पुण्यात दहशत असल्याचे म्हटले जाते. हत्या, खंडणी, अपहरण यांसारखे अनेक गंभीर गुन्हे त्यांच्या नावावर आहेत. मकोकाची कारवा होत असताना तो परदेशी, लंडनला पळून गेला. आता निलेश घायवळला पासपोर्ट कसा मिळाला आणि तो परदेशी कसा पळून गेला याचा तपास पोलीस करत आहेत.