Pune News : पुण्यातील एका शाळेवर राष्ट्रीय तपास यंत्रणेने (NIA) जप्तीचा कारवाई केली आहे. या शाळेच्या इमारतीचे दोन मजले जप्त केले आहेत. ब्लू बेल शाळेच्या इमारतीचा चौथा आणि पाचवा मजला राष्ट्रीय तपास यंत्रणेने सील केला आहे.

पॉप्युलर फ्रंट ऑफ इंडिया (PFI) कडून या इमारतीचा वापर होत असल्याच्या संशयातून राष्ट्रीय तपास यंत्रणेने ही कारवाई केली आहे. या दोन्ही मजल्यांवर दहशतवादी कृत्य करणे, भरती प्रक्रिया करणे, दहशतवादी कृत्याचं प्रशिक्षण आणि टार्गेट किलिंगच प्रशिक्षण देण्यास वापर झाल्याचा राष्ट्रीय तपास यंत्रणेचा दावा आहे. (Latest Marathi News)

काही महिन्यापूर्वी राष्ट्रीय तपास यंत्रणेने याठिकाणी धाड टाकली होती. २२ सप्टेंबर रोजी येथे सर्च ऑपरेशन करण्यात आलं होतं. त्यावेळी याठिकाणी पॉप्युलर फ्रंट ऑफ इंडिया (PFI) संबंधीचे कार्यालय असल्याचे आणि काही कागदपत्र सापडले होते. यानंतर राष्ट्रीय तपास यंत्रणेनं हा कारवाईचा फास आवळला आहे.

PFIवर पाच वर्षांची बंदी

संघटना पॉप्युलर फ्रंट ऑफ इंडियावर दहशतवादी निधी आणि इतर बेकायदेशीर कृत्य केल्याप्रकरणी पाच वर्षांसाठी बंदी घालण्यात आली आहे. केंद्रीय गृह मंत्रालयाने ही कारवाई केली आहे. राष्ट्रीय तपास यंत्रणा आणि सर्व राज्यांच्या एजन्सींनी पीएफआयच्या अनेक ठिकाणी छापे टाकून शेकडो सदस्यांना ताब्यात घेतले होते.

पीआयएफ ही संघटना जबरदस्तीने धर्मांतर करण्याचे काम करते, असाही आरोप होत होता. एनआयएने पीएफआयवर शस्त्र प्रशिक्षण शिबिरे चालवल्याचा आरोप केला होता. एवढेच नाही तर ही संघटना तरुणांना दहशतवादी कारवायांमध्ये सामील होण्यासाठी प्रवृत्त करते, असाही गंभीर आरोप होता.