मुंबई - राज्यात उष्णतेची लाट वाढत असून मुंबईकर देखील उन्हाळ्यातील उकाड्याने हैराण झाले आहेत. त्यामुळे मुंबईकरांनी एसी लोकलच्या गारेगार प्रवासाला पसंती दिली आहे. एसी लोकलच्या खिश्याला न परवडणाऱ्या आता मुंबईकरांना मोठी खुशखबर रेल्वे विभागाने दिली आहे. आता एसी लोकलच्या तिकिटाचे दर ५० टक्क्यांनी कमी झाल्याने वाढलेल्या उकाड्यात मुंबईकर आता गारेगार प्रवासाचा सुखद अनुभव घेऊ शकणार आहेत. नव्या तिकीट दरानुसार गारेगार प्रवासासाठी मुंबईकरांना किती पैसे मोजावे लागणार हे जाणून घेऊया.

सीएसएमटी ते दादरसाठी एसी लोकलच्या तिकीट दर ६५ रुपये असून ५० टक्क्यांनी दरात कपात केल्याने ३० रुपये प्रवाशांना मोजावे लागणार आहेत. सीएसएमटी ते ठाणे स्थानक आताचा तिकीट दर १८० असून आता ९० रुपये, सीएसएमटी ते कल्याण स्थानक आताचा तिकीट दर २१० रुपये असून ५० टक्के कपातीनुसार १०५ रुपये इतका तिकीट दर असणार आहे. तसेच सीएसएमटी ते टिटवाळादरम्यान तिकीट दर २२० इतका आताचा असून नव्या दरानुसार ११० रुपये असेल तर सीएसएमटी ते अंबरनाथ स्थानकादरम्यान आताचा तिकीट दर २०५ रुपये असून नव्या दरानुसार १०० रुपये आकारले जातील.

त्याचप्रमाणे चर्चगेट ते बोरिवली आताचा तिकीट दर १८० रुपये इतका असून नव्या दरानुसार ९० रुपये तर चर्चगेट ते विरार स्थानकादरम्यान २२० रुपये आताचा तिकीट दर असून ११० रुपये इतका कमी झालेला तिकीट दर असणार आहे. या एसी लोकलच्या नव्या तिकीट दाराची लवकरच अंमलबाजवणी केली जाईल. त्यानंतर मुंबईकरांना उन्हाच्या उकाड्यात गारेगार प्रवासाचा सुखद अनुभव घेता येणार आहे.