Supriya Sule on Ajit Pawar: राष्ट्रवादी काँग्रेस पक्षाचा २४ वा वर्धापनदि मुंबईतील षण्मुखानंद सभागृहात बुधवारी पार पडला. या कार्यक्रमात विधानपरिषदेचे विरोधीपक्षनेते अजित पवार यांनी जोरदार भाषण केलं. मला विरोधी पक्षनेतेपदाच्या जबाबदारीतून मुक्त करा, अशी इच्छा अजित पवार यांनी जाहीरपणे बोलून दाखवली. (Latest Marathi News)

मला संघटनेतील कोणतंही पद द्या, मी त्या पदाला न्याय देईन, असंही अजितदादा म्हणाले. दरम्यान, अजित पवारांच्या या वक्तव्याची चांगलीच चर्चा रंगली. यावर राष्ट्रवादी काँग्रेसच्या कार्यकारी उपाध्यक्षा सुप्रिया सुळे यांनी प्रतिक्रिया दिली आहे.

अजितदादांची इच्छा पूर्ण व्हावी, हीच माझीही इच्छा

अजितदादांची इच्छा पूर्ण व्हावी, हीच माझीही इच्छा आहे. मला मनापासून आनंद आहे की, दादालाही संघटनेत काम करायची इच्छा आहे. यामुळे कार्यकर्त्यांमध्ये चांगलाच उत्साह आहे. माझ्या भावाच्या सर्व इच्छा पूर्ण होवोत, हेच बहीण म्हणून मला वाटते, असे सुप्रिया सुळे (Supriya Sule) यांनी म्हटलं आहे.

इतकंच नाही, तर अजितदादांना प्रदेशाध्यक्षपद द्यायचं की नाही हा संघटनात्मक पातळीवरचा निर्णय आहे, असंही सुप्रिया सुळे म्हणाल्या. दरम्यान, सुप्रिया सुळे यांच्या या विधानाने अजित पवार यांना आता राष्ट्रवादी काँग्रेस पक्षात नवी जबाबदारी मिळणार का? अशा चर्चा सुरू झाल्या आहेत.

अजित पवार नेमकं काय म्हणाले होते?

राष्ट्रवादी काँग्रेसच्या वर्धापनदिनी भाषण करताना अजित पवार (Ajit Pawar) म्हणाले, मला विरोधी पक्षनेतेपदावर बसण्यात फार रस नव्हता. सर्व आमदारांनी सह्या केल्या आणि त्यांच्या आग्रहाखातर मी विरोधी पक्षनेता झालो. एक वर्ष हे पद सांभाळतोय. पण आता मला या पदाच्या जबाबदारीतून मला मुक्त करा आणि मला पक्ष संघटनेची जबाबदारी द्या, असं अजित पवार यांनी म्हटलं होतं.

विशेष बाब म्हणजे, अजित पवार यांनी आपल्या भाषणात जयंत पाटील यांच्या प्रदेशाध्यक्षपदाचा कार्यकाळ किती महिन्यांचा आहे, याचा आवर्जून उल्लेख केला होता. राष्ट्रवादी काँग्रेस पक्षाच्या घटनेनुसार तीन वर्षांनी नवा प्रदेशाध्यक्ष निवडणे अपेक्षित आहे. मात्र, जयंत पाटील यांना प्रदेशाध्यक्षपदी येऊन ५ वर्ष १ महिन्यांचा कालावधी झाला आहे, असं ते म्हणाले होते.

Edited by - Satish Daud