प्राची कुलकर्णी

Supriya Sule News : शरद पवारांचं पावसातील भाषण हे देशाच्या राजकारणातील यादगार भाषण आहे . या भाषणात शरद पवारांनी भाजपवर टीका केली होती. या सभेमुळे निवडणुकीतील राजकीय समीकरण बदललं होतं. या सभेमुळे दस्तुरखुद्द उदयनराजे भोसले यांचा पराभव झाला होता. या साताऱ्यातील पोटनिवडणुकीत श्रीनिवास पाटील जिंकले होते. याच शरद पवारांच्या भाषणावरील एका प्रश्नाला खासदार सुप्रिया सुळे (Supriya Sule) यांनी उत्तर देत खासदार सुप्रिया सुळे यांनी साताऱ्यातील भाषणाचा किस्सा सांगितला.

पुणे डॉक्टर्स असोसिएशनचा वतीने एक मुलगी असणाऱ्या कुटुंबांचा सन्मान करण्यात येत आहे. गणेश कला क्रीडा रंगमंच येथे होणाऱ्या या कार्यक्रमात राष्ट्रवादीचे अध्यक्ष शरद पवार आणि खासदार सुप्रिया सुळे यांची मुलाखत घेण्यात येत आहे. या कार्यक्रमातील मुलाखतीत शरद पवार आणि सुप्रिया सुळे यांनी विविध प्रश्नांवर उत्तरे दिली.

शरद पवारांच्या पावसातील भाषणावर सुप्रिया सुळे म्हणाल्या, 'शरद पवार पावसात भिजले, तेव्हा आम्हाला माहितच नव्हतं. फोन केला तेव्हा आम्ही शशिकांत शिंदे यांच्या वाढदिवसाचा केक कापत होतो. त्यामुळे हे काही माहितच नव्हतं. पण साताऱ्याची सभा ही भारतीय राजकारणातील मोठी शिकवण आहे, असं संसदेत पण म्हणतात'.

'मी वडिलांना 'अनप्रिडिक्टेबल' म्हणाले, तेव्हा मी २१ वर्षांची होते. आता ५२ वर्षांची आहे. आता मी म्हणेन 'स्ट्राँग' हा एकच शब्द आहे, त्यांचं वर्णन करायला. तर पवार कधीच कालबाह्य नसतात, नाहीत. त्यांना सगळं माहित असतं. मी आणि दादा कंटाळतो, इतकं त्यांना माहित होतं. आम्हाला वाटलं कशाला यांना कोणी सांगितलं', असेही पुढे सुळे म्हणाल्या.