सचिन गाड| मुंबई, ता. २ ऑगस्ट २०२४

राष्ट्रवादी काँग्रेस शरदचंद्र पवार पक्षाचे नेते, आमदार जितेंद्र आव्हाड यांच्या गाडीवर काल हल्ला करण्यात आला. संभाजीराजे छत्रपती यांच्याबाबत आक्षेपार्ह विधान केल्याने स्वराज्य संघटनेच्या कार्यकर्त्यांनी आव्हाड यांची गाडी फोडली. याबाबत आता महत्वाची अपडेट समोर आली असून एक जणाला ताब्यात घेण्यात आले आहे.

याबाबत सविस्तर माहिती अशी की, विशाळगडावरील हिंसाचारावरुन जितेंद्र आव्हाड यांनी छत्रपती संभाजीराजे यांच्यावर निशाणा साधला होता. विशाळगडावरील हिंसाचार हा संभाजीराजेंमुळेच झाला, असा आरोप त्यांनी केला होता. यावरुनच स्वराज्य संघटनेच्या कार्यकर्त्यांनी काल आव्हाड यांच्या गाडीवर हल्ला केला.

आमदार जितेंद्र आव्हाड हे गाडीमधून ठाण्याकडे येत असतानाच पी डिमेलो रोडवर त्यांच्या गाडीवर हल्ला करत तोडफोड करण्यात आली. या हल्ला प्रकरणी आता महत्वाची अपडेट समोर आली असून डोंगरी पोलिसांनी नवी मुंबईमधून एकाला ताब्यात घेण्यात आले आहे.

दरम्यान, आव्हाड यांच्या गाडीवरील हल्ल्याप्रकरणी स्वराज्य संघटनेचे सरचिटणीस धनंजय जाधव आणि अंकुश कदम यांच्यावर गुन्हा दाखल करण्यात आला आहे. हल्ल्या प्रकरणी डोंगरी पोलीस ठाण्यात हत्येचा प्रयत्न करणे, गुन्हेगारी कट रचणे आणि दंगल माजवण्याचे आरोपांखाली गुन्हे नोंद करण्यात आले आहेत. पोलीस या दोघांचा शोध घेत आहेत.