मावळ: अवघ्या काही दिवसांवर आलेल्या नवरात्रौत्सवासाठी दुर्गामातेच्या मूर्ती तयार करण्याची लगबग सध्या मावळमधील कुंभारवाड्यात सुरू झाली आहे. यंदा महाकाली, सिंहावर आरुढ आणि बंगाली पद्धतीच्या दुर्गामूर्ती घडविण्याचे काम देहु मधील कुंभार वाडयात तसेच मावळ मधील अनेक  ठिकाणी सुरू आहे. मात्र सध्या पडत असलेल्या पावसामुळे मूर्ती सुकविण्याचे मोठे संकट सध्या मूर्तीकारांवर आहे. त्यामुळे हीटर, कोळसे आणि लाकडे जाळून मूर्ती सुकविण्याची कसरत मूर्तीकारांना करावी लागत आहे. (Navratri festival at Kumbharwada in Dehu; The Ghatsthapana will take place on October 7)

हे देखील पहा -

शहरातील विविध भागात नवरात्रौत्सवाची तयारी जोरात सुरू झाली आहे. सात ऑक्टोबर रोजी घटस्थापना असल्यामुळे मूर्ती घडविण्याचे काम अंतिम टप्प्यात आले आहे. सद्यस्थितीत साच्यातून तयार मूर्ती बाहेर काढण्यात आल्या आहेत. त्यावर तणस आणि मातीचा लेप चढवून मूर्तीला प्राथमिक रुप देण्यात कलावंत गुंतले आहेत. तर काही ठिकाणी मूर्तीसाठी मिश्रण तयार करण्यापासून ओतीव काम, साच्यातील मूर्तीला पॉलिश करण्याचे काम सुरू असल्याचे दिसून येते.

आदिशक्ती माता दुर्गेच्या उपासनेचे पर्व म्हणून नवरात्रौत्सव सर्वत्र मोठ्या भक्तीभावाने आणि उत्साहात साजरा केला जातो. शैलपुत्री, ब्रम्हचारिणी, चद्रघंटा, कुष्मांडा, स्कंदमाता, कात्यायनी, कालरात्री, महागौरी व सिद्दीदात्री अशा देवीच्या नऊ रूपांची आराधना नऊ दिवस केली जाते. मात्र कोरोनामुळे अनेक बंधने यावर्षी देखील नवरात्र उत्सवासाठी आहेत. मूर्तीची उंची त्याचप्रमाणे उत्सव साजरा करण्यावर बंधने असल्याने मूर्ती घडवणाऱ्या कलाकारांनी देखील कमी मुर्त्या घडवल्या आहेत. केवळ एक ते चार फुटांच्या मुर्त्या यावर्षी बनविण्यात आल्या आहेत.

यावर्षी सर्वात जास्त मागणी ही आंबाबाई आणि सप्तश्रृंगी मातेच्या चार फुटांच्या मूर्त्यांना आहे. देहु परिसरातील कुंभार वाडयात दुर्गामातेच्या एक ते चार फूट उंचीच्या मूर्ती तयार आहेत. सध्या कुंभार वाडयामध्ये मूर्ती घडविण्याचे काम अंतिम टप्प्यात आले आहे. यंदा वेगवेगळ्या पद्धतीच्या मूर्ती घडविल्या जात आहेत. परंतु कच्चा माल महाग झाल्याने मूर्त्यांच्या किंमतीमध्ये देखील मोठ्या प्रमाणात वाढ झाली आहे.

Edited By - Akshay Baisane