नवी मुंबईतील कोपरखैरणे परिसरात दोन तरुणींवर गोळीबार झाल्याची धक्कादायक घटना समोर आली आहे. गुरुवारी रात्री साडेनऊच्या सुमारास सेक्टर १ मधील एसएस-३ परिसरात हा प्रकार घडला. या घटनेमुळे परिसरात भीतीचे वातावरण निर्माण झाले असून नागरिकांमध्ये चिंतेचे वातावरण आहे.पोलीस या घटनेचा सखोल तपास करत आहेत.

मिळालेल्या माहितीनुसार, दोन तरुणी गुरुवारी रात्री परिसरात असताना त्यांच्यावर अचानक गोळीबार करण्यात आला. या हल्ल्यात एका तरुणीच्या कानाजवळ गोळी लागली, तर तिच्यासोबत असलेल्या दुसऱ्या मैत्रिणीच्या पाठीला गोळी लागली. दोघीही या हल्ल्यात गंभीर जखमी झाल्या आहेत. घटना घडल्यानंतर जखमी तरुणींना तातडीने उपचारासाठी नवी मुंबई महानगरपालिकेच्या रुग्णालयात दाखल करण्यात आले.

मात्र, त्यांची प्रकृती लक्षात घेता पुढील उपचारांसाठी त्यांना मुंबईतील जे. जे. रुग्णालयात हलवण्यात आले आहे. सध्या दोघींवर तेथे उपचार सुरू आहेत. या घटनेची माहिती मिळताच कोपरखैरणे पोलिसांनी घटनास्थळी धाव घेतली. पोलिसांनी तातडीने तपास सुरू करत या प्रकरणातील मुख्य आरोपी अर्जुन चव्हाणला अटक केली आहे. मात्र, या घटनेत सहभागी असलेला दुसरा संशयित राकेश चव्हाण हा गोळीबारानंतर घटनास्थळावरून पळून गेला. त्याचा शोध घेण्यासाठी पोलिसांकडून प्रयत्न सुरू आहेत.

दरम्यान, दोन तरुणींवर गोळीबार करण्यामागचे नेमके कारण अद्याप समोर आलेले नाही. हा हल्ला कोणत्या कारणातून करण्यात आला, याचा शोध पोलीस घेत आहेत. आरोपींमध्ये आणि जखमी तरुणींमध्ये आधीपासून काही वाद होता का, यासह इतर बाबींचीही चौकशी केली जात आहे.कोपरखैरणेसारख्या गजबजलेल्या परिसरात रात्रीच्या वेळी घडलेल्या या गोळीबाराच्या घटनेमुळे नागरिकांमध्ये भीती पसरली आहे. या प्रकरणाचा पुढील तपास कोपरखैरणे पोलीस करत आहेत.