Navi Mumbai Panvel Mumbra Highway Hit And Run Accident नवी मुंबईतून मोठी दुर्घटना घडली आहे. पनवेल-मुंब्रा महामार्गावरील रोडपल्ली सर्कलजवळ शुक्रवारी दुपारी भीषण अपघात घडला. हिट-अँड-रनच्या थरारक दुर्घटनेत ३१ वर्षीय तरुणाचा दुर्दैवी मृत्यू झाला. कृष्णमोहन झा असे मृत व्यक्तीचे नाव असून, अज्ञात अवजड वाहनाने चिरडल्याने त्यांचा जागीच मृत्यू झाल्याची माहिती आहे. याप्रकरणी पोलीस पुढील तपास करत असून चालक घटनास्थळावरुन फरार झाला आहे.

मिळालेल्या माहितीनुसार, शुक्रवारी दुपारच्या सुमारास कोपरखैराणे येथील रविराज दहिफळे हे रोडपल्ली सर्कल परिसरातून वाहनाने जात असताना त्यांना रस्त्यावर गंभीर जखमी अवस्थेत एक व्यक्ती पडलेली दिसली. त्यांनी तातडीने कळंबोली पोलिसांना या घटनेची माहिती दिली. माहिती मिळताच पोलिसांचे पथक घटनास्थळी दाखल झाले.

पोलिसांनी जखमी व्यक्तीची ओळख पटवण्यासाठी त्याच्या खिशाची तपासणी केली असता ड्रायव्हिंग लायसन आणि ओळखपत्र सापडले. त्यावरून मृत व्यक्तीची ओळख कृष्णमोहन झा अशी पटली. त्यानंतर पोलिसांनी खासगी रुग्णवाहिकेच्या मदतीने झा यांना तातडीने पनवेल उपजिल्हा रुग्णालयात दाखल केले. मात्र, रुग्णालयात पोहोचताच डॉक्टरांनी त्यांना मृत घोषित केले. अपघातातील गंभीर दुखापतीमुळे त्यांचा मृत्यू झाल्याचे प्राथमिक तपासात समोर आले आहे.

या प्रकरणी कळंबोली पोलिसांनी (Kalamboli Police) अज्ञात अवजड वाहनाच्या अज्ञात चालकाविरोधात भारतीय न्याय संहिता (BNS) तसेच मोटार वाहन कायद्यांतर्गत संबंधित कलमानुसार गुन्हा दाखल केला आहे. दरम्यान, अपघातानंतर वाहनचालक घटनास्थळावरून फरार झाला आहे. पोलिसांनी परिसरातील सीसीटीव्ही फुटेज ताब्यात घेतले असून वाहनाचा आणि चालकाचा शोध सुरू केला आहे. (Panvel Bike Accident News )