नालासोपारा शहरात नवजात बाळाच्या कथित विक्रीचा धक्कादायक प्रकार उघडकीस आला आहे. एका १७ वर्षीय अल्पवयीन मुलीने खासगी रुग्णालयात बाळाला जन्म दिल्यानंतर अवघ्या एका दिवसात या नवजात बाळाची ४० हजार रुपयांना विक्री केल्याचा आरोप आहे. या प्रकरणामुळे परिसरात खळबळ उडाली असून, तुळींज पोलिसांनी संबंधित व्यक्तींविरोधात गुन्हा दाखल केला आहे.

मिळालेल्या माहितीनुसार, नालासोपारा पूर्वेकडील संतोष भवन परिसरात असलेल्या सूर्या रुग्णालयात रविवारी ही घटना घडली. १७ वर्षीय अल्पवयीन मुलीची या रुग्णालयात प्रसूती झाली होती. त्यानंतर अवघ्या एका दिवसात नवजात बाळाची ४० हजार रुपयांना विक्री केल्याचा प्रकार घडल्याचे प्राथमिक तपासात समोर आले आहे. बेकायदेशीररीत्या प्रसूती करून बाळाची विक्री करण्यात आल्याचा संशयही पोलिसांकडून व्यक्त केला जात आहे.

दरम्यान, सोमवारी अल्पवयीन मुलीच्या पोटात दुखू लागल्याने तिला महापालिकेच्या रुग्णालयात दाखल करण्यात आले. यावेळी या प्रकरणाची माहिती समोर आल्यानंतर संपूर्ण प्रकार उघडकीस आला. त्यानंतर पोलिसांनी तपास सुरू केला आहे. या प्रकरणात अल्पवयीन मुलीवर अत्याचार केल्याचा आरोप असलेला २२ वर्षीय तरुण, मुलीची आई, एक महिला शेजारीण, प्रसूती करणारे डॉक्टर तसेच बाळ खरेदी केल्याचा आरोप असलेल्या दाम्पत्याविरोधात तुळींज पोलीस ठाण्यात गुन्हा दाखल करण्यात आला आहे.

या प्रकरणातील २२ वर्षीय तरुणाला अल्पवयीन मुलीवरील कथित अत्याचाराच्या प्रकरणात पॉक्सो (POCSO) कायद्यांतर्गत अटक करण्यात आली आहे. न्यायालयाने त्याला शनिवारपर्यंत पोलीस कोठडी सुनावल्याची माहिती आहे. नवजात बाळाची विक्री नेमकी कोणाच्या पुढाकाराने करण्यात आली, यामध्ये आणखी कोणाचा सहभाग आहे का आणि या व्यवहारामागील नेमके कारण काय, याचा तपास पोलीस करत आहेत. तसेच संबंधित रुग्णालयातील प्रसूती आणि बाळाच्या संदर्भातील बाबींचीही चौकशी होण्याची शक्यता आहे.