मुंबईकरांसाठी महत्त्वाची बातमी आहे. पांजरापूर पंपिंग स्टेशनवर सुरू असलेल्या तांत्रिक कामामुळे दोन दिवस मुंबईतील काही भागांमध्ये १५ टक्के अतिरिक्त पाणीकपात लागू करण्यात आली आहे. या पार्श्वभूमीवर बृहन्मुंबई महानगरपालिकेने नागरिकांना पाण्याचा अत्यंत जपून वापर करण्याचे आवाहन केले आहे.

महापालिकेच्या पाणीपुरवठा विभागाकने दिलेल्या माहितीनुसार, पांजरापूर पंपिंग स्टेशनमधील ६.६ के.व्ही. पॅनेल बदलण्याचे काम हाती घेण्यात आले आहे. हे काम २८ जुलै रोजी सकाळी ९वाजल्यापासून २९ जुलै रोजी पहाटे ५ वाजेपर्यंत सुरू राहणार आहे. या कालावधीत काही भागांतील पाणीपुरवठ्यावर परिणाम होणार असल्याने नागरिकांना पाणीटंचाईचा सामना करावा लागू शकतो. विशेष म्हणजे, मुंबईत आधीपासूनच १० टक्के पाणीकपात सुरू आहे. त्यात आजच्या तात्पुरत्या १५ टक्के अतिरिक्त कपातीमुळे अनेक भागांमध्ये पाणीपुरवठा कमी दाबाने किंवा उशिराने होण्याची शक्यता आहे. ऐन पावसाळ्यातही पाणीकपात कायम असल्याने नागरिकांमध्ये नाराजीचे वातावरण आहे.

दरम्यान, गेल्या काही दिवसांतील मुसळधार पावसामुळे मुंबईला पाणीपुरवठा करणाऱ्या सातही धरणांमधील जलसाठा मोठ्या प्रमाणात वाढला आहे. सध्या धरणांतील एकूण जलसाठा सुमारे ८८ टक्क्यांवर पोहोचला असून ही दिलासादायक बाब आहे. मात्र, पावसाची अनिश्चितता लक्षात घेता सध्याची नियमित १० टक्के पाणीकपात तातडीने मागे घेण्यात येणार नसल्याचे महापालिकेने स्पष्ट केले आहे.

महापालिकेच्या माहितीनुसार, ऑक्टोबरपर्यंत पाणीकपात मागे घेण्याबाबत कोणताही निर्णय अपेक्षित नाही. परतीच्या पावसाचा आढावा घेतल्यानंतरच पुढील निर्णय घेतला जाणार आहे. तोपर्यंत नागरिकांनी पाण्याचा काटकसरीने वापर करून प्रशासनाला सहकार्य करावे, असे आवाहन करण्यात आले आहे.