Wadala Accident: मुंबईत अपघातांचे सत्र सुरूच आहे. अपघातांची मालिका सुरू असताना वडाळा परिसरात हिट अण्ड रनची घटना घडली. वडाळ्यातील आंबेडकर कॉलेजजवळ एका कारनं चार वर्षाच्या मुलाला चिरडलं आणि तेथून पलायन केलं. या अपघातात निष्पाप मुलाचा अंत झाला. या घटनेनंतर परिसरात हळहळ व्यक्त होत आहे.

चारचाकी चालवणाऱ्या आरोपीचं नाव भूषण संदीप गोळे आहे. तो विलेपार्ले येथील रहिवासी आहे. तो ड्रायव्हर म्हणून कार्यरत आहे. याप्रकरणी पोलिसांनी आरोपी भूषणला अटक केली आहे. तसेच अपघातातील लहान मुलाचा शवविच्छेदनासाठी केईएम रूग्णालयात पाठण्यात आलं असून, आयुष लक्ष्मण किनवडे असे मृत चिमुकल्याचं नाव आहे.

नेमकं घडलं काय?

पोलिसांनी दिलेल्या माहितीनुसार, आयुष हा त्याच्या आई वडिलांसोबत वडाळ्यातील आंबेडकर कॉलेजजवळील फूटपाथवर राहत होता. त्याचे वडील मजूर आहेत. शनिवारी सायंकाळी आरोपी भूषण संदीप गोळे आंबेडकर कॉलेज जवळील परिसरात यु-टुर्न घेत होता, त्याच वेळी आयुष गाडीच्या चाकाखाली आला. या अपघातात चिमुकल्याला गंभीर दुखापत झाली. त्यानंतर आरोपी भूषणने तेथून पलायन केलं.

आयुषला कार अपघातात गंभीर दुखापत झाली, त्यामुळे त्याला ताताडीनं रूग्णालयात दाखल करण्यात आलं. मात्र, डॉक्टरांनी आयुषला मृत घोषित केलं. पोलिसांना घटनेची माहिती मिळताच त्यांनी आरोपीला ताब्यात घेतलं. तसेच या प्रकरणी पुढील तपास पोलीस करीत आहेत. चिमुकला आयुषचा असा अंत झाल्यामुळे परिसरात हळहळ व्यक्त होत आहे.