Virar News:

विरार मधील आगाशी गावातील एका गणेशोत्सव मंडपात पोलिसांनी छापा मारला. यावेळी घाबरुन पळून जाताना एका २० वर्षीय मुलाचा ह्रदयविकाराच्या धक्क्याने मृत्यू झाल्याचे समोर आले आहे. प्रचित भोईर असे या मुलाचे नाव असून या घटनेने परिसरात एकच खळबळ उडाली आहे.

विरार पश्चिमेच्या आगाशी जवळील कोल्हापूर येथील गणेशोत्सव (Ganapati Festival) मंडपात काही तरूण मुले जागरण करत पत्ते खेळत होती. शनिवारी पहाटे तीनच्या सुमारास अर्नाळा सागरी पोलिसांचे गस्तीवरील वाहन छापा टाकण्यासाठी आले. पोलिसांना पाहून मुलांची पळापळ सुरू झाली.

याचवेळी पळत असताना प्रचित विनोद भोईर (वय, १९) हा मुलगा खाली कोसळला. त्याला उपचारासाठी विरारच्या संजीवनी रुग्णालयात दाखल करण्यात आले. तेथे त्याचा हृदयविकाराच्या झटक्याने मृत्यू झाल्याचे डॉक्टरांनी सांगितले.

या प्रकारामुळे गावात एकच तणाव निर्माण झाला होता. खबरदारी म्हणून पोलिसांनी संजीवनी रुग्णालयात बंदोबस्त ठेवला होता. पोलिसांच्या हलगर्जीपणामुळे मुलाचा मृत्यू झाल्याचा आरोप मयत मुलाच्या नातेवाईकांनी केला आहे. पोलिसांनी छापा टाकण्याची गरज नव्हती. पोलिसांनी त्याचवेळी त्याला प्रथमोपचार दिले असते तर जीव वाचला असा आरोप नातेवाईकांनी केला.

आम्ही मंडपावर छापा घातला नाही. केवळ रात्रीच्या पोलीसांचे गस्तीचे वाहन तेथून जात होते. पोलीस छापा टाकायला आले आणि ते आपल्याला पकडतील या भीतीने मुले पळाली आणि त्यात या मुलाचा हृदयविकाराच्या झटक्याने मृत्यू झाला असे अर्नाळा सागरी पोलीस ठाण्याचे वरिष्ठ पोलीस निरीक्षक कल्याणरावर करपे यांनी सांगितले आहे. (Latest Marathi News )