मयूर राणे, साम टीव्ही

राज्यात अपघातांची मालिका सुरुच असल्याचं पाहायला मिळत आहे. समृद्धी महामार्गावर अपघाताची घटना ताजी असताना मुंबईतही भीषण अपघाताची घटना घडली आहे. मुंबईत भांडुपमध्ये बेस्ट बसचा भीषण अपघात झाला. मुंबईच्या भांडुप रेल्वे स्थानकाजवळ भरधाव बसने अनेकांना चिरडल्याची घटना घडली आहे. या अपघातात चार जणांचा मृत्यू झाला आहे.

मुंबईतील भांडुप रेल्वे स्थानकाजवळ असलेल्या स्टेशन बस डेपो जवळ बस खाली येऊन चार जणांचा मृत्यू झाला. कामावरून घरी जाणाऱ्या लोकांच्या वर्दळीदरम्यान हा अपघात झाला. भांडूप पश्चिम भागात बेस्ट बसने चार-पाच जणांना चिरडले. त्यातील चौघांचा मृत्यू झाल्याची माहिती मिळत आहे.

भांडूप पश्चिम भागात झालेल्या अपघाताची माहिती मिळताच परिसरात मोठा गोंधळ पाहायला मिळाला. अपघातानंतर बघ्यांची एकच गर्दी झाली. या अपघाताची माहिती मिळताच अग्निशामक दलाचे जवान घटनास्थळी पोहोचले. त्यांनी तातडीने अपघातात जखमी झालेल्यांना जवळील रुग्णालयात दाखल केले. पोलिसांनी घटनास्थळी पोहोचून लोकांची गर्दी पांगवली.

तत्पूर्वी, काही महिन्यांपूर्वी कुर्ल्यातील पूर्व भागातही बेस्ट बसच्या भीषण अपघाताची घटना घडली होती. या बेस्ट बस अपघातात अनेकांचा मृत्यू झाला होता. त्यानंतर आज सोमवारी भांडुपमध्ये भीषण अपघाताची घटना घडली. मुंबईतील वाढत्या बेस्ट बस अपघात चिंतेचा विषय ठरत आहे.