Mumbai Crime : मुंबईत हादरवणारी घटना घडली आहे. मुंबईत दोन समलैंगिक तरुणांच्या प्रेमाचा दुर्दैवी अंत झाला. १६ वर्षीय मुलाने कोल्ड ड्रिंक प्यायल्यानंतर मृत्यू झाल्याची घटना घडली. मात्र, १९ वर्षीय तरुणाने माझ्या १६ वर्षीय मुलाला कोल्ड ड्रिंकमधून विष दिल्याने मृत्यू झाल्याचा आरोप वडिलांनी केला आहे. मृत मुलाच्या वडिलांच्या आरोपाने खळबळ उडाली आहे.

मीडिया रिपोर्टनुसार, १६ वर्षीय मुलाच्या वडिलांनी केलेल्या खळबळजनक आरोपानंतर पोलिसांनी १९ वर्षीय तरुणाला पोलिसांनी ताब्यात घेतलं आहे. पोलीस आता फोरेन्सिक अहवालाची वाट पाहत आहेत.

मृत मुलाच्या वडिलांनी तक्रारीत म्हटलं की, 'माझा मुलगा २९ जून रोजी फिरायला जात असल्याचे सांगून घराबाहेर गेला. पण त्या रात्री घरी परतलाच नाही. त्यानंतर त्याची शोधाशोध सुरु केली.

दुसऱ्या दिवशी १६ वर्षीय मुलाच्या मित्राने तो त्याच्या १९ वर्षीय मित्राच्या घरी गेल्याचं सांगितलं. त्यानंतर १६ वर्षीय मुलाचे वडील त्याच्या घरी पोहोचले. त्यावेळी दोघेही बेडवर एकमेकांच्या बाजूला झोपलेले होते. त्यावेळी वडिलांनी मुलाला जागे करण्याचा प्रयत्न केला. मात्र, मुलगा जागा झालाच नाही. त्यामुळे वडिलांनी डॉक्टरांना बोलावून घेतलं. त्यावेळी डॉक्टरांनी १६ वर्षीय मुलाचा मृत्यू झाल्याचे सांगितले.

पोलिसांच्या तपासात समोर आलं की, 'आरोपीने पीडित मुलाला कोल्ड ड्रिंक दिलं. कोल्ड ड्रिंक प्यायल्यानंतर मुलाला उलट्या झाल्या. त्यानंतर त्याचा मृत्यू झाला. पोलीस अद्याप फोरेन्सिक अहवालाची वाट पाहत आहेत. मुलाच्या वडिलांच्या तक्रारीनंतर गुन्हा नोंदवण्यात आला आहे.

तक्रारीनुसार, आरोपीने मुलाला ४ महिन्याआधी नागपूरला घेऊन गेला होता. त्याविषयी मुलाच्या कुटुंबीयांना माहिती नव्हती. रिपोर्टनुसार, पीडित मुलाच्या कुटुंबीयांनी आरोपीपासून दूर राहण्यास सांगितलं होतं. कुटुंबीयांनी सांगितल्यानंतर दोघांनी भेटणे आणि बोलणे बंद केलं होतं. भेटणे आणि बोलणे बंद झाल्यामुळे आरोपीने मुलाची हत्या करण्याचं षडयंत्र रचल्याचा पोलिसांचा संशय आहे. पोलिसांनी आरोपीला अटक केली आहे. पोलिसांनी पुढील तपास सुरु केला आहे.