मुंबईकरांसाठी मोठी बातमी समोर आली आहे. येत्या रविवारी म्हणजेच १८ जानेवारी रोजी होणाऱ्या टाटा मुंबई मॅरेथॉनसाठी, मुंबई वाहतूक पोलिसांनी एका वाहतूक अधिसूचनेत दक्षिण आणि मध्य मुंबईत वाहतूक वळवणे, रस्ते बंद करणे आणि पार्किंग निर्बंध जाहीर केले आहे. त्यामुळे तुम्ही देखील या काळात दक्षिण आणि मध्य मुंबईत प्रवास करणार असाल तर आधी वेळापत्रक वाचा.

मुंबई शहरात जानेवारी महिन्यात विविध आस्थापने, सामाजिक संस्था, तसेच संघटनांकडून मॅरेथॉनचे आयोजन करण्यात येते. यात हजारो स्पर्धक सहभागी होतात. त्यातील टाटा मॅरेथॉन ही सगळ्यात मोठी मॅरेथॉन मानली जाते. या वर्षीच्या टाटा मुंबई मॅरेथॉनमध्ये फुल मॅरेथॉन, हाफ मॅरेथॉन, १० किमी धावणे, एलिट रेस, चॅम्पियन विथ डिसॅबिलिटी रन, ज्येष्ठ नागरिक धावणे आणि ड्रीम रन यांचा समावेश असेल.

या शर्यतीत हजारो धावपटू सहभागी होणार असल्याचा अंदाज व्यक्त करण्यात आला आहे. मॅरेथॉनचा ​​मार्ग सीएसएमटी, आझाद मैदान, मरीन ड्राइव्ह, वरळी, दादर, माहीम, वांद्रे आणि लगतच्या रस्त्यांसारख्या महत्त्वाच्या भागातून जाईल. सुरक्षिततेच्या पार्श्वभूमीवर पोलिसांनी वाहतुकीत मोठे बदल केले आहे. धावपटूंच्या सुरक्षिततेसाठी, १८ जानेवारी २०२६ रोजी पहाटे ३:०० ते दुपारी २:०० वाजेपर्यंत आपत्कालीन आणि अत्यावश्यक सेवा वाहने वगळता, अनेक प्रमुख रस्ते नियमित वाहतुकीसाठी बंद राहतील. वाहतूक अधिसूचनेनुसार, मॅरेथॉनच्या वेळेत दक्षिण मुंबई, वरळी, माहीम आणि वांद्रे येथील मोठ्या भागांनाही वाहनांसाठी बंदी असलेले क्षेत्र घोषित केले जाईल. बहुतेक शर्यती छत्रपती शिवाजी महाराज टर्मिनस (सीएसएमटी) किंवा जवळच्या ठिकाणांपासून सुरू होतील आणि मरीन ड्राइव्ह, वरळी सी फेस, कोस्टल रोड आणि वांद्रे-वरळी सी लिंक भागातून जातील,असे पोलिसांनी सांगितले आहे.

मॅरेथॉनची वेळ कशी असेल?

पूर्ण मॅरेथॉन (४२.१९५ किमी ): सकाळी ५:०० ते दुपारी १२:३०

हाफ मॅरेथॉन (२१.०९७ किमी): सकाळी ५:०० ते ९:१०

१० किमी वेळेनुसार धावणे: सकाळी ६:०० ते ८:०० वाजेपर्यंत

एलिट मॅरेथॉन शर्यत: सकाळी ७:०० ते १०:३०

अपंगत्वासह चॅम्पियन रन: सकाळी ७:०५ ते ७:४५

ज्येष्ठ नागरिक धाव: सकाळी ७:२५ ते ८:४५

ड्रीम रन: सकाळी ८:१५ ते ११:००

'या' ठिकाणी पार्किंगवर मनाई

मॅरेथॉनच्या दिवशी पहाटे ४:०० ते दुपारी २:०० वाजेपर्यंत एमजी रोड, डीएन रोड, मरीन ड्राइव्ह, वीर नरिमन रोड, पेडर रोड, वरळी सी फेस रोड, डॉ. अ‍ॅनी बेझंट रोड, खान अब्दुल गफ्फार खान रोड, वांद्रे-वरळी सी लिंक अ‍ॅप्रोच रोड यासारख्या रस्त्यांवर सर्व प्रकारच्या वाहनांचे पार्किंग करण्यास सक्त मनाई असेल.

पोलिसांचे आवाहन

वाहतूक पोलिसांनी नागरिकांना खाजगी वाहनांचा वापर टाळण्याचा, स्थानिक गाड्या आणि सार्वजनिक वाहतुकीला प्राधान्य देण्याचा आणि त्यांच्या प्रवासाचे आधीच नियोजन करण्याचा सल्ला दिला आहे. पोलिसांनी नागरिकांना वाहतूक पोलिसांच्या सूचना आणि फलकांचे पालन करण्याचे आवाहन केले आहे. शिवाय हे वाहतूक निर्बंध तात्पुरते आहेत आणि रविवारी टाटा मुंबई मॅरेथॉन २०२६ पूर्ण होईपर्यंत ते लागू राहतील, असे वाहतूक अधिसूचनेत म्हटले आहे.