Weather Update : राज्यात थंडी गायब, तापमानाचा पारा वाढला; राज्यात आज कुठे कसे हवामान?

राज्यात ढगाळ हवामान आणि पावसाळी वातावरण झाल्याने राज्याच्या किमान तापमानात वाढ झाली आहे. गारठा काहीसा कमी झाल्याने उकाडा जाणवू लागला आहे. आज राज्याच्या किमान तापमानातील वाढ कायम राहण्याचा, तर उद्यापासून किमान तापमानात पुन्हा हळूहळू घट होण्याचा अंदाज हवामान विभागाने वर्तवला आहे. दरम्यान काही जिल्ह्यांमध्ये हलक्या पावसाचा अंदाज वर्तवण्यात आला आहे.

हवामान विभागानुसार काल धुळे येथे ७ अंश सेल्सिअस तापमानाची नोंद झाली. निफाड येथे ७.७ अंश सेल्सिअस तापमान नोंदले गेले. तसेच जळगाव, भंडारा, गोंदिया, नागपूर आणि यवतमाळ येथे ११ अंश व त्यापेक्षा कमी तापमानाची नोंद झाली. उर्वरित राज्याच्या किमान तापमानात वाढ झाली आहे.

आज राज्यात तापमानात वाढ होऊ लागल्याने उकाडा जाणवू लागला आहे. तसेच ढगाळ हवामान निर्माण झाल्याने पाऊस पडण्याची शक्यता वर्तवण्यात आली आहे. तर उद्यापासून किमान तापमानात चढ-उतार होण्याची शक्यता हवामान विभागाने वर्तविली आहे.

किमान तापमानाचा पारा १० अंशांच्या खाली आल्यास, तसेच तापमानात सरासरीच्या तुलनेत ४.५ अंशांची घट झाल्यास थंडीची लाट, तर तापमानात ६.५ अंशांपेक्षा अधिक घट झाल्यास तीव्र लाट आल्याचे समजले जाते. सतत बदलत राहणाऱ्या हवामानामुळे नागरिकांच्या आरोग्यावर परिणाम होत आहे. तसेच शेतकऱ्यांच्या शेतपिकांवर देखील याचे गंभीर परिणाम होत आहेत.