Mumbai Dadar Shivaji Park 1st May Maharashtra Din Parade वाहनधारकांनो येत्या १ मे रोजी मुंबई शहरातील गजबजलेल्या दादर परिसरात फिरणार असाल तर ही बातमी तुमच्यासाठी. महाराष्ट्र दिनानिमित्त दादर परिसरात आयोजित करण्यात येणाऱ्या भव्य परेडमुळे मुंबई पोलिसांनी वाहनचालकांसाठी विशेष वाहतूक सूचना जारी केली आहे. १ मे रोजी शिवाजी पार्क मैदानावर महाराष्ट्र दिनाची परेड पार पडणार असून, सकाळी ६ ते दुपारी १२ या कालावधीत दादर आणि आसपासच्या भागातील अनेक रस्त्यांवर वाहतुकीत बदल व निर्बंध लागू राहणार आहेत.

मुंबई वाहतूक पोलिसांनी दिलेल्या माहितीनुसार, परेड सुरळीत आणि सुरक्षित पार पडावी यासाठी ही विशेष वाहतूक व्यवस्था करण्यात आली आहे. या कालावधीत दादर, शिवाजी पार्क आणि लगतच्या प्रमुख मार्गांवर वाहनांची ये-जा मर्यादित राहणार आहे. त्यामुळे नागरिकांनी या वेळेत या भागात प्रवास टाळावा आणि पर्यायी मार्गांचा वापर करावा, असे आवाहन करण्यात आले आहे.

वाहनचालकांना विशेषतः सकाळी ६ ते दुपारी १२ या वेळेत दादर आणि शिवाजी पार्क परिसर टाळण्याचा सल्ला देण्यात आला आहे. तसेच, आवश्यक असल्यास कोहिनूर बीएमसीच्या वाहनतळातच पार्किंग करण्याची सूचना पोलिसांनी केली आहे. स्थानिक रहिवासी आणि इतर नागरिकांनी जे. के. सावंत रोडवरील प्लाझा सिनेमाजवळील बीएमसीच्या कोहिनूर पार्किंग लॉटचा वापर करावा, असेही स्पष्ट करण्यात आले आहे.

दरम्यान, नागरिकांना कोणतीही अडचण येऊ नये यासाठी विविध ठिकाणी वाहतूक पोलीस कर्मचारी तैनात असतील. बदललेल्या रस्त्यांची दिशा दाखवण्यासाठी तसेच वाहन धारकांच्या माहितीसाठी सूचना फलकाचा वापर करण्यात येणार आहे. मिरवणुकीचा मार्गही पोलिसांनी जाहीर केला आहे. परेडची सुरुवात शिवाजी पार्क मैदानाच्या गेट क्रमांक ५ पासून होईल. तेथून केळुस्कर रोड (उत्तर), सी. रामचंद्र चौक, एस. सावरकर रोड (दक्षिण), वसंत देसाई चौक मार्गे मिरवणूक पुढे जाईल आणि नारळी बाग येथे संपेल. महाराष्ट्र दिनाचा सोहळा शांततेत आणि सुव्यवस्थितपणे पार पडावा, यासाठी मुंबई पोलिसांनी नागरिकांना सहकार्य करण्याचे आवाहन केले आहे.