मुंबईकरांसाठी मोठी बातमी! कोस्टल रोडवर लवकरच हेलिपॅड सुरु करण्यात येणार आहे. त्यासाठी वरळी येथे उभारण्यात आलेल्या मुंबईतील पहिल्या सार्वजनिक हेलिपॅडचे संचालन आणि देखभालीसाठी महापालिकेने कंत्राटदार नेमण्याची प्रक्रिया सुरू करण्यात आली आहे. यासाठी २ फेब्रुवारीपर्यंत निविदा सादर करण्याची अंतिम मुदत देण्यात आली आहे.

वरळी येथील डेअरीसमोर समुद्रात सुमारे १२० मीटर आत असलेल्या जेट्टीवर हे अत्याधुनिक हेलिपॅड उभारण्यात आले आहे. हे हेलिपॅड दक्षिण मुंबईतील पहिलेच सरकारी मालकीचे सार्वजनिक हेलिपॅड असणार आहे. आतापर्यंत दक्षिण मुंबईत हेलिकॉप्टर उतरवण्यासाठी राजभवन किंवा महालक्ष्मी रेसकोर्स या दोनच जागांचा वापर केला जात होता.

मात्र आता कोस्टल रोडमुळे प्रवाशांसाठी नवा पर्याय उपलब्ध झाला आहे. हेलिपॅड चालविण्याचे कंत्राट सुरुवातीला पाच वर्षांच्या कालावधीसाठी दिले जाण्याची शक्यता वर्तवण्यात आली आहे. कंत्राटदाराला पालिकेला ठराविक मासिक परवाना शुल्क आणि प्रत्येक लँडिंगमधून मिळणाऱ्या उत्पन्नाचा काही हिस्सा द्यावा लागेल, असे पालिकेने सांगितले.

या हेलिपॅडचं वैशिष्ट्ये म्हणजे, आपत्कालीन काळात रुग्णांना तातडीने रुग्णालयात नेण्यासाठी या हेलिपॅडचा वापर प्राधान्याने केला जाणार आहे. त्यामुळे गंभीर असलेल्या रुग्णांचे प्राण बचावले जातील . तसेच किनारपट्टीची सुरक्षा आणि आपत्ती व्यवस्थापनासाठी कोस्टल पोलिस व सुरक्षा दलांना हे केंद्र फायदेशीर ठरणार आहे. दरम्यान अतिमहत्त्वाच्या व्यक्तींच्या प्रवासासाठी महालक्ष्मी रेसकोर्सवरील ताण देखील कमी होणार आहे.