Mumbai Crime : वडिलांनी दारू सोडण्यासाठी सांगितलं, मुलाने थेट २१ व्या मजल्यावरून उडी मारली; मुंबईतील धक्कादायक घटना

मुंबईतील वडाळामधून धक्कादायक बातमी समोर आली आहे. वडाळा येथील एका तरुणाने तो राहत असलेल्या अपार्टमेंटच्या २१ व्या मजल्यावरून उडी मारली. धक्कादायक म्हणजे वडिलांनी दारूचे व्यसन सोडण्यासाठी सल्ला दिल्याने तरुणाने हे पाऊल उचलले असल्याचं म्हटलं जात आहे. या दुर्घटनेत त्याचा जागीच मृत्यू झाला आहे. प्राथमिक अंदाजानुसार ही आत्महत्या असल्याचे म्हटले जात आहे. सदर घटना रविवारी भरदिवसा घडली आहे. या घटनेमुळे संपूर्ण कुटुंबावर शोककळा पसरली असून मुंबई पोलीस या घटनेचा सविस्तर तपास करत आहेत.

मिळालेल्या माहितीनुसार, मृताचे नाव हैदर कराचीवाला असे आहे. हैदरला दारूचे व्यसन होते, ज्यामुळे घरी अनेकदा वाद होत होते आणि तणाव वाढला होता. शनिवारी सकाळी हैदरचा त्याच्या कुटुंबियांशी वाद झाला. त्यानंतर तो रागाच्या भरात घराबाहेर पडला. त्यानंतर काही वेळातच त्याचे वडील युसूफ कराचीवाला यांना पहाटे ४ वाजताच्या सुमारास विलेपार्ले पोलिस ठाण्यातून फोन आला.

पोलिसांनी सांगितले की त्यांचा मुलगा दारूच्या नशेत सापडला आहे आणि त्याला घरी घेऊन जावे. वडील रविवारी सकाळी ६ वाजताच्या सुमारास त्याला घरी घेऊन आले. घरी परतल्यानंतर, हैदरच्या पालकांनी त्याला समजावून सांगण्याचा प्रयत्न केला आणि त्याला दारू सोडण्याचा सल्ला दिला.

या वादविवादानंतर हैदर त्याच्या खोलीत गेला. बराच वेळ हैदर खोलीबाहेर न पडल्याने त्याच्या वडिलांनी त्याला हाक मारली. मात्र हैदरने काहीच उत्तर दिले नाही. त्यामुळे हैदरच्या वडिलांना शंका आली. त्यामुळे ते हैदरच्या खोलीत गेले. दरम्यान सकाळी ८:१५ च्या सुमारास, हैदरच्या वडिलांना तो त्याच्या खोलीतून पडल्याचे आढळले.

यानंतर कुटुंबीयांनी पोलिसांना घडलेल्या घटनेबाबत पाचारण केले असता पोलिसांनी घटनास्थळी धाव घेतली. घटनेचा पंचनामा करून मृतदेह शवविच्छेदनासाठी पाठवण्यात आला. पोलिसांच्या प्राथमिक अंदाजानुसार हे आत्महत्येचं प्रकरण असल्याचं म्हटलं जात आहे. मात्र ठोस कारण अद्यापही समोर आलेलं नाही. याप्रकरणी पोलीस अधिक तपास करत असून हैदरच्या कुटुंबावर दुःखाचा डोंगर कोसळला आहे.