संजय गडदे, साम टीव्ही

Mumbai Spicejet plane : कांडला ते मुंबई या मार्गावर उड्डाण करणाऱ्या स्पाइसजेटच्या Q400 विमानाला आज एक मोठा धोका टळला. विमानाने कांडला विमानतळावरून उड्डाण घेतल्यानंतर धावपट्टीवर विमानाचे एक बाहेरील चाक (Outer Wheel) पडलेले आढळले. या गंभीर तांत्रिक बिघाडानंतरही महिला पायलट पूजा चौधरी ने अपार धैर्य, कौशल्य आणि शांतता दाखवत ७५ प्रवाशांचा जीव वाचवला आहे.

कांडला (गुजरात) येथून मुंबईकडे येणाऱ्या SG 2906 या स्पाइसजेटच्या फ्लाइटचे उजव्या बाजूचे बाहेरील चाक उड्डाणादरम्यान खाली पडले. ही बाब अत्यंत गंभीर असली तरी, पायलट पूजा चौधरी यांनी आपला धीर न सोडता विमानावर पूर्ण नियंत्रण ठेवले. मुंबई विमानतळावर दुपारी १५.५१ वाजता त्यांनी विमान सुरक्षित उतरवले. लँडिंग इतके सुरळीत होते की विमानाने स्वतःच्या शक्तीवर टर्मिनलपर्यंत प्रवास केला आणि सर्व प्रवाशांनी व्यवस्थितपणे बाहेर पडले. या घटनेत कोणतीही जीवितहानी झाली नाही.

ही घटना घडली त्या क्षणी प्रवाशांच्या मनात भीतीचे वातावरण होते, मात्र महिला पायलटने आपले तज्ज्ञत्व, निर्णयक्षमता आणि मनोबल दाखवत परिस्थितीवर मात केली. तिच्या जलद व योग्य निर्णयामुळे संभाव्य दुर्घटनेतून सर्वांना वाचवता आले. ७५ प्रवाशांचे प्राण वाचवणाऱ्या या महिला पायलटचे संपूर्ण देशभरातून कौतुक होत आहे. ही घटना केवळ तांत्रिक बिघाडावर मात करण्याची कथा नाही तर भारतीय महिला वैमानिकांच्या क्षमतेचे आणि धाडसाचे प्रतीक आहे.

या प्रसंगाने महिला पायलट पूजा चौधरी यांचे धैर्य, निर्णयक्षमता आणि व्यावसायिक कौशल्य अधोरेखित झाले आहे. ७५ जणांचा जीव सुरक्षित ठेवल्यामुळे त्यांच्यावर संपूर्ण देशभरातून कौतुकाचा वर्षाव होत आहे. ही घटना भारतीय महिला वैमानिकांच्या शौर्य व कार्यक्षमतेचे प्रेरणादायी उदाहरण म्हणून इतिहासात नोंदली जाणार आहे.