मुंबईच्या काळाचौकी परिसरात बॉयफ्रेंडने केलेल्या जीवघेणा हल्ल्यात तरुणीचा उपचारादरम्यान मृत्यू झाला आहे. या हल्ल्यानंतर आरोपी बॉयफ्रेंडने आयुष्य संपवलं. मुंबईतील हत्याकांडाने परिसरात खळबळ उडाली आहे. पोलिसांनी या प्रकरणी कारवाईला सुरुवात केली आहे.

मिळालेल्या माहितीनुसार, मुंबईतील काळाचौकी परिसरात प्रेमसंबंधातून दोघांमध्ये वाद झाला. त्यानंतर २४ वर्षीय तरुणाने गर्लफ्रेंडवर चाकून हल्ला केला. या जीवघेण्या हल्ल्यात गंभीर जखमी झालेल्या तरुणीला तातडीने रुग्णालयात दाखल केलं. मात्र, या तरुणीचा उपचारादरम्यान मृत्यू झाला. तर गर्लफ्रेंडवर जीवघेणा हल्ला केल्यानंतर बॉयफ्रेंडनेही चाकूने स्वतःवर वार करून आत्महत्येचा प्रयत्न केला. यात तरुणाचा मृत्यू झाला.

नेमकं प्रकरण काय?

पोलिसांनी दिलेल्या माहितीनुसार, मुंबईतील तरुणाचे मुलीसोबत प्रेमसंबंध होते. गेल्या काही महिन्यांपासून तो तिच्यावर परस्त्रीसंबंधांचा संशय घेत होता. या जोडप्यामध्ये या कारणावरून वारंवार वाद व्हायचे. आज सकाळी दोघांची पुन्हा भेट झाल्यानंतर वाद चिघळला. त्यानंतर संतापलेल्या तरुणाने चाकूने मुलीवर वार केला.

या हल्ल्यात तरुणीचा रुग्णालयात उपचारादरम्यान मृत्यू झाला. या हल्ल्यादरम्यान त्याने स्वतःलाही त्याच चाकूने वार करून आयुष्य संपवलं. काळाचौकी पोलिसांनी घटनास्थळी पंचनामा केला आहे. तसेच पोलिसांनी या प्रकरणाचा पुढील तपास सुरू केला आहे.

शिपाई किरण सूर्यवंशी यांनी दाखवलं धाडस

बॉयफ्रेंड तरुणीवर हल्ला करत असताना भायखळा वाहतूक विभागातील पोलीस शिपाई किरण सूर्यवंशी यांनी मोठं धाडस दाखवलं. पार्किंगच्या तक्रारीवर कारवाईदरम्यान आस्था नर्सिंग होममध्ये तरुणीवर चाकूने हल्ल्याची माहिती मिळताच किरण सूर्यवंशी घटनास्थळी धावले. त्यांनी पीडितेची आरोपीच्या तावडीतून सुटका करून तिला स्वतः डॉ. बाबासाहेब आंबेडकर हॉस्पिटलमध्ये दाखल केले.जखमी तरुणीला पुढे सर जेजे रुग्णालयात हलवण्यात आलं. मात्र, तरुणीचा उपचारादरम्यान मृत्यू झाला.