मुंबई आणि मुंबई उपनगरामध्ये अवकाळी पावसाने हजेरी लावली आहे. भरदुपारी अंधार, जोरदार वादळी वाऱ्यासह मुंबईत मुसळधार पावसाला सुरूवात झाली. या पावसामुळे मुंबईकरांचे हाल होत आहे. कामावरून घराच्या दिशेने जाणाऱ्या मुंबईकरांची तारंबळ उडाली. मुंबईतील रस्ते वाहतुकीसह रेल्वे वाहतुकीवर, हवाई वाहतुकीवर आणि मेट्रो वाहतुकीवर परिणाम होण्यास सुरूवात झाली आहे.

हवामान खात्याने मुंबईकरांना सतर्कतेचा इशारा दिला आहे. मुंबईकरांनो घराबाहेर पडताना काळजी घेण्याचे आवाहन हवामान खात्याने केले आहे. मुंबईत पुढील ३ तासांमध्ये वादळी वाऱ्यासह मुसळधार पाऊस पडण्याची शक्यता वर्तवण्यात आली आहे. मुंबईत ४० ते ५० किमी प्रतितास वेगाने वारे वाहण्याची शक्यता आहे. त्यामुळे मुंबईकारांनी घराबाहेर पडताना खबरदारी घेण्याचे आवाहन हवामान खात्याने केले आहे.

मुंबई विमानतळावरची हवाई वाहतूक विस्कळीत झाली आहे. वादळी वाऱ्यासह पडणाऱ्या मुसळधार पावसामुळे मुंबईतील हवाई वाहतुकीवर परिणाम झाला आहे. मुंबई विमानतळावर उतरणारे अनेक विमाने दुसरीकडे वळवण्यात आले आहेत. मुंबईतल्या दादर, लोअर परेल, माटुंगा, सायन, कुर्ला, विद्याविहार, घाटकोपर, विक्रोळी, मुलुंड या परिसरात जोरदार पाऊस पडत आहे. या पावसामुळे अनेक ठिकाणी सखल भागांमध्ये पाणी साचण्यास सुरूवात झाली आहे. त्यामुळे रस्ते वाहतुकीवर परिणाम झाला आहे. अनेक ठिकाणी वाहतूक कोंडी झाली आहे.

हवामान खात्याकडून मुंबईत 15 मे पर्यंत अवकाळी पाऊस पडण्याचा अंदाज वर्तवण्यात आला होता. हवामान खात्याचा अंदाज कुठेतरी खरा ठरतोय. मुंबईतील अनेक भागांमध्ये मुसळधार पाऊस पडत आहे. सोसाट्याच्या वाऱ्यासह तुफान पाऊस पडत आहे. या पावासामुळे मुंबईत अनेक ठिकाणी झाडं कोसळल्याची घटना घडली आहे. घाटकोपरमध्ये पेट्रोल पंपावर होर्डिंग कोसळल्याची घटना घडली आहे. या ठाकिणी अनेक जण अडकल्याची शक्यता वर्तवली जात आहे.

मुसळधार पावासाचा फटका ऐन गर्दीच्या वेळी मुंबई लोकल सेवा आणि मेट्रो सेवेवेर झाला आहे. मध्य रेल्वेची धिम्या मार्गावरील वाहतूक विस्कळीत झाली आहे. मुंबईवरून ठाण्याच्या दिशेने जाणारी वाहतूक विस्कळीत झाली आहे. तर मुंबई मेट्रो -१ ची वाहतूक देखील विस्कळीत झाली आहे. असल्फा मेट्रो स्टेशनजवळ पाणी साचले आहे.