सचिन गाड, मुंबई

मुंबईमध्ये एका तरुणीचा झोपेत असताना टेरेसवरून पडून दुर्दैवी मृत्यू झाल्याची घटना घडली आहे. मुंबईच्या शिवडी परिसरामध्ये ही घटना घडली आहे. याप्रकरणी शिवडी पोलिसांनी अपघाती मृत्यूची नोंद करत पुढील तपास सुरू केला आहे. या घटनेमुळे शिवडीमध्ये हळहळ व्यक्त केली जात आहे.

मिळालेल्या माहितीनुसार, शिवडीमध्ये १९ वर्षीय तरुणीचा इमारतीच्या चौथ्या मजल्यावरून पडून मृत्यू झाला. ही तरुणी चौथ्या मजल्यावर राहत होती आणि ती टेरेसमध्ये झोपली होती. त्याचवेळी झोपेतच ती चौथ्या मजल्यावरून खाली पडली. या घटनेमध्ये गंभीर जखमी झालेल्या तरुणीला तात्काळ केईएम रुग्णालयात नेण्यात आले. पण डॉक्टरांनी उपचारापूर्वीच तिला मृत घोषीत केले.

कशिष शेख ऊर्फ कशिष कसबे असं या मृत तरुणीचं नाव आहे. पोलिसांनी मुलीच्या आईचा जबाब नोंदवला असून तिची काही तक्रार नसल्याचे म्हटले आहे. तरी देखील पोलिसांनी अपघाती मृत्यची नोंद करत घटनेच्या तपासला सुरूवात केली आहे. ही मुलगी झोपेत असी कशी खाली पडली असा प्रश्न सध्या अनेकांना पडला आहे.