Summary -

• जोगेश्वरीत बांधकाम साईटवर तीन कामगार खाली पडले

• एका कामगाराचा जागीच मृत्यू तर दोघे गंभीर जखमी

• मृत आणि जखमींचे वय फक्त १७ आणि १८ वर्षे

• जोगेश्वरी पोलिसांकडून तपास सुरू

संजय गडदे, मुंबई

मुंबईतल्या जोगेश्वरीमध्ये बांधकाम सुरू असलेल्या इमारतीमध्ये भयंकर अपघात झाला आहे. तिसऱ्या मजल्यावर काम सुरू असताना ३ कामगार अचानक खाली कोसळले. या अपघातामध्ये एका कामगाराचा मृत्यू तर दोघे जण गंभीर जखमी झाले आहेत. जखमी कामगारांना उपचारासाठी रुग्णालयामध्ये दाखल करण्यात आले आहे. या अपघाताचा तपास सध्य्या जोगेश्वरी पोलिसांकडून सुरू आहे.

मिळालेल्या माहितीनुसार, जोगेश्वरी पूर्वेतील सोसायटी रोड परिसरात बांधकाम सुरू असलेल्या ‘देवभूमी कन्स्ट्रक्शन’ साईटवर सोमवारी मध्यरात्री अपघात झाला. मध्यरात्री १२ वाजताच्या सुमारास इमारतीच्या तिसऱ्या मजल्यावर काम सुरू होते. काम करत असताना तीन कामगार अचानक खाली कोसळले. घटनेची माहिती मिळताच जोगेश्वरी पोलिसांनी घटनास्थळी धाव घेतली. त्यांनी तात्काळ गंभीर जखमी झालेल्या कामगारांना उपचारासाठी महापालिकेच्या ट्रॉमा केअर रुग्णालयात दाखल केले. त्यापैकी एका कामगाराला डॉक्टरांनी उपचारापूर्वीच मृत घोषित केले. तर उर्वरित दोघांवर पुढील उपचार सुरू आहेत.

या अपघातातील कामगारांचे वय फक्त १७ आणि १८ वर्षे असल्याचे समोर आले आहे. त्यामुळे बालकामगारांना धोकादायक ठिकाणी कामावर ठेवण्यात आल्याचा गंभीर आरोप होत आहे. बांधकाम साईटवर आवश्यक सुरक्षा साहित्य न वापरल्याने हा अपघात घडल्याची शक्यता पोलिसांनी वर्तवली आहे. कामगारांच्या सुरक्षेची जबाबदारी विकासक आणि कंत्राटदारांवर असतानाही अशा निष्काळजीपणामुळे तरुणाने जीव गमावल्यामुळे परिसरात संतापाचे वातावरण आहे. स्थानिक नागरिक आणि कामगार संघटनांनी दोषींवर कठोर कारवाईची मागणी केली आहे. सध्या जोगेश्वरी पोलिसांकडून या घटनेचा तपास सुरू आहे.