चालत्या फिरत्या माणसाला हृदयविकाराचा झटका; अवघ्या काही सेकंदात जीव गेला

उत्तर प्रदेशच्या किराणा दुकानात वस्तू खरेदी करणाऱ्या व्यक्तीचा हृदयविकाराच्या झटक्याने मृत्यू झाल्याची घटना घडली आहे. सहारनपूरमधील संपूर्ण घटनाक्रम सीसीटीव्ही कॅमेऱ्यात कैद झाला आहे. हा सीसीटीव्ही व्हिडिओ सोशल मीडियावर प्रचंड व्हायरल होत आहे. सहानपूरमधील भूरी बान्स गावात ही घटना घडली.

मिळालेल्या माहितीनुसार, मनोज मित्तल असे मृत्यू झालेल्या व्यक्तीचे नाव आहे. मनोज मित्तल हे घरात दैनंदिन लागणाऱ्या वस्तू दुकानातून खरेदी करत होते. दुकानातून वस्तू खरेदी करताना दुकानदाराशी गप्पा मारत होते. त्याचवेळी दुकानदार इतर ग्राहकांना वस्तू देत होता. दुकानदाराशी गप्पा मारताना अचानक मित्तल यांची तब्येत बिघडली.

सीसीटीव्ही फुटेजमध्ये स्पष्ट दिसत आहे की, मनोज मित्तल तोल ढासळल्यानंतर एका महिलेजवळ जमिनीवर कोसळले. जमिनीवर कोसळल्यानंतर बेशुद्ध झाले. त्यानंतर दुकानाजवळ एकच गर्दी झाली. घटनास्थळी असलेले लोक घाबरले.

काही लोकांनी त्यांच्या चेहऱ्यावर पाणी शिंपडले. काहींनी त्यांना आवाज देऊन उठवण्याचा प्रयत्न केला. त्यांच्या नातेवाईकांनी त्यांना रुग्णालयात दाखल करण्याची तयारी करू लागले. नातेवाईकांनी तातडीने त्यांना रुग्णालयात दाखल केले. परंतु रुग्णालयात नेण्याआधी त्यांची तब्येत बिघडली होती.डॉक्टरांनी प्राथमिक तपासणी केल्यानंतर मनोज यांना मृत घोषित केले. मित्तल यांचा मृत्यू हृदयविकाराच्या झटक्याने झाल्याचे डॉक्टरांनी सांगितले.

या घटनेने मित्तल कुटुंब राहत असलेल्या परिसरावर शोककळा पसरली. मित्तल यांच्या मृत्यूने त्यांच्या नातेवाईकांना मोठा धक्का बसला आहे. ही संपूर्ण घटना सीसीटीव्हीत कॅमेऱ्यात कैद झाली आहे. या घटनेचा व्हिडिओ सोशल मीडियावर व्हायरल होत आहे.