मयुर राणे, साम टीव्ही

महाराष्ट्रात आगीच्या घटनांची मालिका सुरुच आहे. नागपूरनंतर आता मुंबईच्या कुर्ला पश्चिम परिसरात गॅस पाईपलाईन फुटून मोठ्या प्रमाणात आग लागल्याची घटना घडली. या आगीत चार दुकाने जळून खाक झाले आहेत. मुबारक कॉम्प्लेक्सजवळ गॅसलाईनला ही आग लागल्याची माहिती मिळत आहे. आगीनंतर परिसरातील लोकांची एकच धावाधाव झाली.

मुंबईतील वर्दळीचा परिसर असलेल्या कुर्ल्यामध्ये आग लागल्याची घटना घडली. कुर्ल्यातील मुबारक कॉम्प्लेक्सजवळ दुपारच्या सुमारात गॅस लाईन फुटली. त्यानंतर लागलेल्या आगीत तीन ते चार जळून खाक झाली. आग लागल्यानंतर आजूबाजूला उभे असलेल्या लोकांची एकच धावाधाव झाली. या परिसरातील लोकांनी तातडीने अग्निशमन दलाला माहिती दिली. घटनेची माहिती मिळाल्यानंतर पोलीस देखील घटनास्थळी पोहोचले. पोलिसांनी तातडीने परिसर रिकामा केला.

नागपुरात कापूरच्या कंपनीला आग

नागपूरच्या एमआयडीसी परिसरातील डीआयडी शोरूमच्या मागच्या बाजूला असलेल्या कापूरच्या फॅक्टरीलाही आग लागल्याची घडली. आग लागल्यानंतर फॅक्टरीजवळील बीवायडी कार शोरूमच्या मागील परिसरात आग पसरली. मयूर इंडस्ट्री असे आग लागलेल्या कापूर कंपनीचे नाव आहे. अचानकपणे आग लागल्याची प्राथमिक माहिती आहे. अद्याप कंपनीने आगीविषयी अधिकृत माहिती दिलेली नाही.

कारखाना आज बंद होता. कामगारांना बुधवार असल्याने सुट्टी होती. कंपनीला आग नेमकी कशामुळे लागली, याचा शोध अद्याप लागलेला नाही. अग्निशामक दलाचे जवान घटनास्थळी पोहोचले आहेत. अग्निशमन दलाचे जवान पाण्याचा मारा करत आहेत. कंपनीतील कापूर हा ज्वलनशील असल्यामुळे आगीवर नियंत्रण मिळवण्यासाठी मोठ्या प्रमाणात अडचण येत आहे.