रुपाली बडवे| मुंबई, ता. २० जुलै २०२४

काही दिवसांपूर्वीच आषाढी वारीनिमित्त पंढरपूरला गेलेले अजय महाराज बारसकर यांची गाडी जाळण्यात आली. त्यानंतर मला जीवे मारण्याच्या धमक्या येत आहेत, असा खळबळजनक आरोप अजय बारसकर यांनी केला आहे. यावरुनच बारसकर यांनी आज आक्रमक पवित्रा घेतला असून मुंबईत उपमुख्यमंत्री देवेंद्र फडणवीस यांचे निवासस्थान असलेल्या सागर बंगल्यासमोर ठिय्या आंदोलन सुरू केले आहे. फडणवीस यांची भेट घेतल्याशिवाय जाणार नाही, अशी भूमिका त्यांनी घेतली असून परिसरात मोठा पोलीस बंदोबस्त ठेवण्यात आला आहे.

काय म्हणाले अजय बारसकर?

"आषाढी एकादशीच्या दिवशी पंढरपुरात माझी गाडी जाळली. मी थांबलो तेव्हा काही लोक माझी चौकशी करत होते. त्यापूर्वी मला १०-१२ धमकीचे फोन आले होते. रात्री २ वाजता माझी गाडी जाळली. मला मनोज जरांगे पाटील यांची भूमिका पटली नाही. म्हणून मी वेगळा झाला. मी समाजाच्या विरोधात नाही," असं अजय महाराज बारसकर म्हणाले.

तातडीने सागर बंगल्यावर

"जरांगे पाटील म्हणाले की मी सागर बंगल्यावर जातो. एवढ्या आवेशात म्हणालात तर गेला का नाहीत? तुम्ही गेला नाहीत आता मी जाणार, पोलिसांनी काय करायच ते करा, माझा मृत्यू झाला तरी तो मराठा समाजासाठी असेल. मी फडणवीस यांना भेटणार असं म्हणत चालू पत्रकार परिषदेतून अजय महाराज हे सागर बंगल्यावर दाखल झाले.

रस्त्यावर ठिय्या आंदोलन..

"देवेंद्र फडणवीस यांची मी भेट घेणार आहे. मी फडणवीसांचा माणूस आहे, असा शिक्का माझ्यावर लावला. बलात्काराचा आरोप केला. माणसाला उध्वस्त करण्याचा हा प्रयत्न आहे, असं म्हणत मराठ्यांसाठी देह गेला तरी चालेल अशी आक्रमक भूमिका बारसकर यांनी घेतली आहे. दरम्यान," त्यांच्या या आंदोलनाच्या ठिकाणी मोठा पोलीस बंदोबस्त ठेवण्यात आला आहे.