मुसळधार पावसानं मुंबईला झोडपून काढलंय. धो-धो पडणाऱ्या पावसामुळे लोकल सेवा ठप्प पडली. त्यामुळे प्रवाशांनी मोनो रेल्वेनं प्रवास करण्याचं ठरवलं पण तेही अर्ध्या वाटेत बंद पडली. चेंबूर ते भक्तीपार्क दरम्यान मोनोरेल अडकून पडली. या ट्रेनमधील प्रवाशांना अग्निशमन दलाच्या जवानांनी अडीच तास रेस्क्यू ऑपरेशन करत सर्व प्रवाशांना बाहेर काढत त्यांना वाचवलंय.

दरम्यान याबाबत मुख्यमंत्री देवेंद्र फडणवीसांनी प्रतिक्रिया देताना चौकशी करण्याचे आदेश दिलेत. तांत्रिक कारणामुळे मोनो रेल बंद पडल्याचं सांगत त्यांनी चौकशी करण्याचे आदेश दिलेत. एमएमआरडीए, अग्निशमन दल आणि महापालिका अशा सर्वच यंत्रणांनी रेस्क्यू ऑपरेशन चालवत प्रवाशांना वाचवलं. मोनो रेल्वेचे काच फोडून प्रवाशांना रेस्क्यू केले गेले.राज्याचे उपमुख्यमंत्री एकनाथ शिंदे यांनी माहिती घेत प्रवाशांशी संवादही साधला.

मोनोरेल का बंद पडली? उपमुख्यमंत्र्यांनी सांगितलं कारण?

हार्बर लाईन बंद असल्याने सर्व गर्दी ही मोनोकडे वळाली. मेट्रोपेक्षा मोनोची क्षमता कमी असते. एका डब्ब्यात ७० -७५ लोक प्रवास करत आहेत. सामान्यत: ही संख्या ४०-५०प्रवासी असतात. क्षमतेपेक्षा जास्त प्रवाशांची गर्दी झाली. त्यामुळे मोनोरेल एका बाजूला झुकली. त्याच्यामुळे इलेक्ट्रीक सप्लाय डिस्कनेट झाला. याच कारणामुळे मोनो ट्रेन बंद पडली. तांत्रिक बाबी आणि इतर चूकांबद्दल नंतर चौकशी करता येईल सध्या बचाव कार्य महत्त्वाचं आहे, असे एकनाथ शिंदे म्हणालेत.

मुंबईत सर्वात मोठं रेस्क्यू ऑपरेशन

मुसळधार पावसाचा फटका रस्ते वाहतूक, रेल्वे वाहतूकीला मोठ्या प्रमाणात बसला. या पावसामुळे मोनोरेल देखील बंद पडली. मोनोरेलमध्ये मोठ्या प्रमाणात प्रवासी अडकले. चेंबूर ते भक्तीपार्क दरम्यान मोनोरेल बंद पडल्यानंत मोनोरेलमधील एसी आणि लाईट देखील बंद झाले. त्यामुळे प्रवासी गुदमरले. घटनास्थळी अग्निशमन दल आणि पोलिसांनी धाव घेतली असून बचाकार्य केले.