संजय गडदे, साम टीव्ही

मुंबईतील मालाड पश्चिम परिसरातील मालवणीमध्ये दहीहंडी उत्सवाला गालबोट लागलं आहे. दहीहंडी फोडण्याच्या कार्यक्रमादरम्यान विटांचा कॉलम अचानक कोसळून त्याखाली दबल्याने ७ वर्षीय चिमुरड्याचा दुर्दैवी मृत्यू झाला आहे. रुद्र कदम असं मृत मुलाचं नाव आहे. मालाड पश्चिमेतील चिकुवाडी, मालवणी परिसरातील एकता वेल्फेअर सोसायटीमध्ये स्थानिक मुलांकडून दहीहंडी फोडण्याचा कार्यक्रम सुरू होता. यावेळी दहीहंडीसाठी झाडाला आणि तळमजल्यावरील विटांच्या कॉलमला दोरी बांधण्यात आली होती. दहीहंडी फोडण्याचा कार्यक्रम सुरू असतानाच हा विटांचा कॉलम अचानक कोसळला.

या दुर्घटनेत कॉलमखाली दबून ७ वर्षीय रुद्र कदम गंभीर जखमी झाला. त्याच्या डोक्याला गंभीर दुखापत झाली होती. घटनेनंतर रुद्रला तातडीने मालवणी जनरल रुग्णालयात नेण्यात आलं. मात्र, डॉक्टरांनी त्याला रुग्णालयात दाखल करण्यापूर्वीच मृत घोषित केलं. घटनेची माहिती मिळताच वॉर्ड कर्मचारी आणि पोलिसांनी घटनास्थळी धाव घेतली. या दुर्घटनेनंतर परिसरात हळहळ व्यक्त केली जात आहे.

दहीहंडी उत्सवाच्या पार्श्वभूमीवर सुरक्षेच्या नियमांकडे दुर्लक्ष झाल्याचा गंभीर प्रश्न आता उपस्थित झाला आहे. उत्सवाच्या ठिकाणी सुरक्षिततेच्या उपाययोजना करण्यात आल्या होत्या का, तसेच धोकादायक पद्धतीने कॉलमला दोरी बांधण्यास परवानगी कशी देण्यात आली, याबाबतही प्रश्न उपस्थित होत आहेत.