संजय गडदे, मुंबई प्रतिनिधी

Mumbai Malad East hit and run case 4 year old boy death : मुंबईतील मालाड पूर्वेकडील निलयोग विराट इमारत परिसरात हृदयद्रावक हिट अँड रनची घटना घडली आहे. इमारतीत राहणाऱ्या सिंग कुटुंबावर आनंदाच्या क्षणांनंतर अवघ्या दोन दिवसांत दु:खाचा डोंगर कोसळला. ५ तारखेला कुटुंबात लग्नसोहळा पार पडला होता, ६ तारखेला संपूर्ण कुटुंब एकत्र होते, तर ७ तारखेला सकाळी त्यांचा चार वर्षांचा मुलगा लक्ष्य इमारतीखाली खेळत असताना भरधाव कारने चिरडले. या अपघाताची माहिती सुरक्षा रक्षकाला देऊन कारचालक घटनास्थळावरून फरार झाला.

या प्रकरणी पोलिसांनी गुन्हा दाखल केला असून आरोपीचा तपास केला जात आहे. धक्कादायक म्हणजे, कार अपघातात मृत्युमुखी पडलेला लक्ष हा पालकांच्या लग्नानंतर २० वर्षांनी झाला होता. एकुलत्या एक मुलाच्या मृत्यूने सिंह कुटुंबावर दुखा:चा डोंगर कोसळलाय. या धक्कादायक घटनेचे सीसीटीव्ही फुटेजही समोर आले आहे. त्यात चार वर्षांच्या मुलाला चिरडल्यानंतर गाडी अचानक थांबताना दिसते. त्यानंतर चालक वॉचमनला सूचना देतो. थोड्याच वेळात, वॉचमन मुलाला हातात घेऊन जाताना दिसतो. त्यानंतर आरोपी घटनास्थळावरून पळून गेला.

भरधाव वेगाने आलेल्या इनोव्हा क्रिस्टा कारने निष्पाप चार वर्षांच्या लक्ष्यला जोरदार धडक दिली. अपघाताची माहिती इमारतीच्या सुरक्षा रक्षकाला देऊन कारचालक घटनास्थळावरून पळून गेला. गंभीर जखमी अवस्थेत असलेल्या लक्ष्यला रुग्णालयात दाखल करण्यात आले, मात्र उपचारादरम्यान त्याचा मृत्यू झाला. मृत लक्ष्यचे वडील जयप्रकाश सिंग यांनी सांगितले की, “अपघातानंतर जर कारचालकाने माझ्या मुलाला तात्काळ रुग्णालयात नेले असते, तर कदाचित आज तो जिवंत असता.” त्यांनी पुढे सांगितले की आरोपीचे त्या इमारतीत पार्किंग असले तरी तो प्रत्यक्षात दुसऱ्याच ठिकाणी राहत होता.

या प्रकरणी पोलिसांनी गुन्हा दाखल केला होता आणि आरोपीला जामीन देण्याची तयारी सुरू होती. मात्र ही माहिती मिळताच सिंग कुटुंबासह नातेवाईकांनी पोलिस ठाण्यात धाव घेत आरोपीला जामीन देण्यापासून रोखले. जयप्रकाश सिंग यांनी गंभीर आरोप करत सांगितले की, कारचालकाने केवळ धडक दिली नाही, तर त्यांच्या चार वर्षांच्या निष्पाप मुलाला काही अंतर गाडीसोबत ओढत नेले. ही थेट हिट अँड रनची घटना असून आरोपीवर कठोरात कठोर कारवाई व्हावी, अशी मागणी त्यांनी केली आहे. या घटनेमुळे परिसरात संतापाचे वातावरण असून, निष्पाप बालकाच्या मृत्यूने संपूर्ण शहर हादरले आहे.