Summary:

• मुंबईत लोकलखाली चिरडून तरुणाचा मृत्यू

• अंधेरी रेल्वे स्थानकावर घडली घटना

• या अपघाताचा थरारक व्हिडीओ समोर आला आहे

संजय गडदे, मुंबई

धावत्या लोकलमध्ये चढताना तोल जाऊन एक तरुण खाली पडला. यावेळी लोकलसोबत फरफटत जाऊन तो ट्रेन आणि प्लॅटफॉर्मच्या मधोमध अडकला. या अपघातामध्ये गंभीर जखमी झालेल्या तरुणाचा दुर्दैवी मृत्यू झाला. ही घटना मुंबईतील अंधेरी रेल्वे स्थानकावर घडली. या अपघाताचा थरकाप उडवणारा व्हिडीओ समोर आला असून तो व्हायरल होत आहे. या घटनेमुळे रेल्वे स्थानकावर एकच खळबळ उडाली होती.

मिळालेल्या माहितीनुसार, ही घटना ४ मे रोजी सायंकाळी ५ वाजताच्या सुमारास अंधेरी रेल्वे स्थानकावर घडली होती. हा तरुण प्लास्टिकच्या बॉटल गोळा करणारा होता. तो नेहमीप्रमाणे अंधेरी रेल्वे स्थानकावरून लोकल पकड होता त्यावेळी ही घटना घडली. पण काही लोकांचे म्हणणे आहे की, हा तरुण लघुशंकेसाठी रेल्वे रुळावर उतरला होता. त्याचवेळी प्लॅटफॉर्म क्रमांक १ वर लोकल आली. ही लोकल पाहून हा तरुण प्लॅटफॉर्मवर चढायला गेला. पण तेवढ्यात त्याला लोकलने धडक दिली. यावेळी लोकलसोबत फरफटत जाऊन तो प्लॅटफॉर्म आणि ट्रेनच्या मधोमध अडकला.

या अपघातामध्ये तरुणाच्या कमरेपासून खालचा संपूर्ण भाग तुटला गेल्यामुळे तो गंभीर जखमी झाला. तसंच त्याच्या डोक्याला गंभीर दुखापत झाली होती. या घटनेनंतर आरपीएफ जवानांनी आणि रेल्वे प्रवाशांनी त्याला बाहेर काढले. लोहमार्ग पोलिसांनी त्याला तात्काळ उपचारासाठी विलेपार्ले पश्चिमेकडील महापालिकेच्या कूपर रुग्णालयात नेले.

मात्र रुग्णालयात दाखल होण्यापूर्वीच त्याचा मृत्यू झाल्याचे डॉक्टरांनी घोषित केले. या अपघातामध्ये कमरेखालचा भाग तुटल्याने आणि प्रचंड रक्तस्राव झाल्यामुळे त्याचा मृत्यू झाल्याचं रुग्णालयातील डॉक्टरांनी सांगितले. मृत तरुणाजवळ कोणत्याही प्रकारचे ओळख पटवणारे कागद पत्र किंवा ओळखपत्र सापडून न आल्यामुळे त्याला बेवारस घोषित केले आहे.