मुंबई : मुंबईतील प्रसिद्ध जे.जे हॉस्पिटलमध्ये काम करणारे ३२ वर्षीय डॉक्टर ओंकार कवितके यांनी सोमवारी रात्री अटल सेतूवरून उडी मारली. घटनेच्या काही मिनिटांपूर्वीच त्यांनी त्यांच्या आईशी बोलून लवकरच घरी जेवणासाठी परत येत असल्याचं सांगितलं होतं. पोलिसांनी मंगळवारी ही माहिती दिली आणि डॉक्टरचा शोध अजूनही सुरू असल्याचं सांगितलं. डॉ. ओंकार कवितके हे नवी मुंबईतील कळंबोली भागातील रहिवासी होते. पोलिसांनी दिलेल्या माहितीनुसार, सोमवारी रात्री एका मोटारचालकाने त्यांना पुलावर त्यांना पाहिलं आणि त्यांनी लगेच पोलीस नियंत्रण कक्षाला माहिती दिली.

पुलावर कार आणि आयफोन सापडला

नवी मुंबईतील उलवे पोलीस घटनास्थळी पोहोचले तेव्हा त्यांना पुलावर पार्क केलेली होंडा अमेझ कार आढळली. कारमध्ये एक आयफोन ठेवण्यात आला होता. फोनमध्ये सापडलेल्या नंबरच्या मदतीने पोलिसांनी कार मालकाची ओळख डॉ. ओंकार म्हणून केली, जे गेल्या सहा वर्षांपासून मुंबईतील जे.जे हॉस्पिटलमध्ये काम करत होते.

उलवे पोलीस स्टेशनचे वरिष्ठ निरीक्षक अर्जुन राजणे यांनी सांगितलं की, फोन कॉल डिटेल्सवरून असं दिसून आलं की डॉक्टरने रात्री ९ वाजून ११ वाजता त्यांच्या आईला फोन केला होता, आणि ते लवकरच जेवणासाठी घरी येत असल्याचं सांगितलं होतं. त्यानंतरही त्यांचा कोणताही पत्ता लागलेला नाहीय. त्यांनी असं पाऊल का उचललं हे समजून घेण्यासाठी पोलीस आता कुटुंब, सहकारी आणि मित्रांशी बोलत आहेत. सध्या पोलिसांनी ही घटना संशयास्पद आत्महत्या मानून तपास सुरू केला आहे. समुद्रात शोध मोहीम सुरू आहे.

डॉ. ओंकार यांचा शोध घेण्यासाठी मरीन पोलीस आणि कोस्ट गार्डच्या मदतीने शोध मोहीम राबवली जात आहे. मात्र, अद्याप त्यांचां कोणताही पत्ता लागलेला नाही. डॉ. कवितके यांनी इतकं मोठं पाऊल का उचललं? हे शोधण्याचा पोलीस प्रयत्न करत आहेत. पोलीस सध्या या प्रकरणाचा प्रत्येक पैलूवरून तपास करत आहेत.