संजय गडदे,साम टीव्ही

मुंबई : मुंबईच्या आरे पोलीस ठाण्याच्या हद्दीतील गोरेगावमधील ओबेरॉय संकुलातील इमारतीच्या २३ व्या मजल्यावरून उडी मारून १७ वर्षीय तरूणीने आत्महत्या केल्याची घटना घडली आहे. तरुणीने नैराश्यामुळे आत्महत्या केल्याची माहिती पोलिसांनी सांगितली. तरुणीच्या आत्महत्येने परिसरात खळबळ उडाली आहे.

मुंबईतील ओबेरॉय संकुलातील ही चौथी आत्महत्येची घटना असल्याची माहिती मिळत आहे. मुंबईतील नामांकित विद्यालयात इयत्ता अकरावीमध्ये ही तरुणी शिक्षण घेत होती. तिचे वडील मुंबईतील प्रसिद्ध बांधकाम व्यावसायिक असल्याचं सांगण्यात येत आहे.

तरुणीच्या घरात गुरुवारी दुपारी साडेतीन वाजण्याच्या सुमारास कोणी नव्हतं. त्यामुळे तरुणीने इमारतीच्या 23व्या मजल्यावरून उडी मारून आत्महत्या केली. तरुणीने आत्महत्या करण्यापूर्वी कोणतीही शेवटच्या चिठ्ठी लिहिली नव्हती.

तरुणीने इमारतीवरून उडी मारल्यानंतर मागील काही दिवसांपासून तिच्यावर अंबानी रुग्णालयात उपचार सुरू होते. तरुणीच्या मृत्यूनंतर परिसरातील लोकांकडून हळहळ व्यक्त केली जात आहे. तरुणीच्या आत्महत्येनंतर पोलिसांनी आरे पोलिसांत अपमृत्यूचा गुन्हा दाखल करण्यात आला. या प्रकरणी पोलिसांनी पुढील तपास सुरु केला आहे.

मागील सहा महिन्यांत ओबेरॉय संकुलातील विविध इमारतींमधून आतापर्यंत चौघांनी आत्महत्या केली आहे. जुलै महिन्यात अनंत द्विवेदी(२२) या तरुणीने आत्महत्या केली. मे महिन्यात १७ वर्षीय शाळकरी विद्यार्थिनीने आत्महत्या केली होती. नागरिकांच्या आत्महत्येच्या वाढत्या घटनांमुळे चिंता व्यक्त केली जात आहे.