संजय गडदे, मुंबई

मुंबईतील महिलांच्या सुरक्षेला आव्हान देणाऱ्या सिरीयल मोलेस्टरला बांगूर नगर पोलिसांनी अवघ्या ४८ तासांत अटक करून मोठे यश मिळवले आहे. रस्त्यावर एकट्या जाणाऱ्या महिलांना लक्ष्य करून त्यांच्याशी अश्लील प्रकार करणाऱ्या या आरोपीमुळे गोरेगाव पश्चिम परिसरात भीतीचे वातावरण निर्माण झाले होते.

पोलिसांनी दिलेल्या माहितीनुसार, ३० मार्च २०२६ रोजी रात्री सुमारे ९:३० वाजता गोरेगाव पश्चिम येथील बांगूर नगर परिसरात एक तरुणी पायी घरी जात होती. त्यावेळी आरोपीने चुकीच्या बाजूने येत अचानक तिच्याशी छेडछाड केली आणि तिच्या शरीराला अश्लील पद्धतीने स्पर्श करून घटनास्थळावरून पळ काढला. या घटनेनंतर पीडित महिलेने बांगूर नगर पोलीस ठाण्यात तक्रार दाखल केली. तक्रारीनंतर पोलिसांनी तत्काळ गुन्हा नोंद करून तपास सुरू केला.

या प्रकरणाचा तपास वरिष्ठ पोलीस निरीक्षक रविंद्र आव्हाड यांच्या मार्गदर्शनाखाली करण्यात आला. आरोपीचा शोध घेण्यासाठी पोलिसांनी परिसरातील तब्बल २९ CCTV कॅमेऱ्यांचे फुटेज तपासले. तांत्रिक विश्लेषण आणि पोलिसांच्या विशेष पथकाच्या मदतीने आरोपीची ओळख पटवण्यात यश आले. तपासादरम्यान पोलिसांनी मुन्नवर नासिर खान (वय २५) याला अटक केली. तो आरे कॉलनी परिसरात राहत असून फिल्मसिटीमध्ये काम करत असल्याची माहिती समोर आली आहे. पोलिस तपासात तो यापूर्वीही अशाच प्रकारच्या चार छेडछाडीच्या घटनांमध्ये सहभागी असल्याचे उघड झाले आहे.

आरोपीविरुद्ध महिलेशी छेडछाड आणि अश्लील कृत्यांबाबत भारतीय दंड संहितेच्या संबंधित कलमांखाली गुन्हे दाखल करण्यात आले आहेत. पोलिसांकडून सध्या आरोपीची अधिक चौकशी सुरू असून आणखी गुन्हे उघडकीस येण्याची शक्यता वर्तवली जात आहे. ही संपूर्ण कारवाई वरिष्ठ अधिकाऱ्यांच्या मार्गदर्शनाखाली पार पडली. बांगूर नगर पोलिसांच्या जलद आणि प्रभावी कारवाईमुळे स्थानिक नागरिकांनी समाधान व्यक्त केले असून महिलांच्या सुरक्षेबाबत पोलिसांनी सतर्कता वाढवली असल्याचे सांगितले आहे.